პრემიერ-მინისტრ ირაკლი ღარიბაშვილის ინიციატივით, განათლების საერთაშორისო ცენტრი შეიქმნა, რომლის მიზანია, ერთი მხრივ, საქართველოს მოქალაქეებისთვის უმაღლესი საერთაშორისო განათლების ხელმისაწვდომობის, მეორე მხრივ კი, საჯარო სექტორის უზრუნველყოფა კვალიფიციური კადრებით დეფიციტურ მიმართულებებში და საერთაშორისო ცოდნის შემოტანა.
აღნიშნულთან დაკავშირებით, მთავრობის ადმინისტრაციის უფროსის მოადგილე ნინო კობახიძემ დღეს გამართულ პრესკონფერენციაზე განაცხადა.
"განათლების საერთაშორისო ცენტრი ახორციელებს სამ ისეთ ძირითად პროგრამას, როგორიცაა წამყვან უნივერსიტეტებში სამაგისტრო და სადოქტორო პროგრამებზე სწავლის დაფინანსება, საზღვარგარეთ მყოფი წრმატებული სპეციალისტების, მკვლევარებისა და პრაქტიკოსების, როგორც საქართველოს მოქალაქეების, ისე უცხოელი სპეციალისტების ქვეყანაში მოწვევა და მათი ცოდნის და გამოცდილების გაზიარება და მესამე - პროფესიული გადამზადებისა და კვალიფიკაციის ამაღლების კურსების ორგანიზება საჯარო სექტორში დასაქმებული მოხელეთათვის", - განაცხადა ნინო კობახიძემ.
მისივე განმარტებით, სადოქტორო და სამაგისტრო პროგრამების დაფინანსება შეუძლია საქართველოს ყველა მოქალაქეს, მათ შორის ოკუპირებულ ტერიტორიებზე მცხოვრებ თანამოქალაქეებს, ასევე განსაკუთრებული ყურადღება მიექცევა შეზღუდული შესაძლებლობების მქონე და სოციალურად დაუცველ პირთა დაფინანსებას.
კობახიძის თქმით, სამაგისტრო და სადოქტორო დაფინანსების მოპოვების შემთხვევაში, სტუდენტები იღებენ ვალდებულებას, რომ სწავლის დასრულების შემდეგ დაბრუნდნენ საქართველოში, იმსახურონ საჯარო სექტორში სულ მცირე 3 წელი და მიღებული ცოდნა მოახმარონ ქვეყნის განვითარებას.
მთავრობის ადმინისტრაციის ინფორმაციით, სამაგისტრო და სადოქტორო პროგრამები წელიწადში ერთხელ გამოცხადდება. წელს განათლების საერთაშორისო ცენტრი მსურველების საბუთების მიღებას დაიწყებს 7 მაისიდან და ეს პროცესი გაგრძელდება 7 ივლისამდე.
აღნიშნული პროგრამის ღირებულება 7 მილიონამდე ლარს შეადგენს. მის განხორციელებას მთავრობის ადმინისტრაცია გაუწევს კურირებას.