პრემიერ-მინისტრმა ირაკლი ღარიბაშვილმა ჯანდაცვის მინისტრ დავით სერგეენკოს მიმართა, რომ პირველი მაისი, შრომის საერთაშორისო დღე საქართველოში უქმე დღედ გამოცხადდეს.
აღნიშნულთან დაკავშირებით, შრომის საერთაშორისო დღის აღსანიშნავ აქციაზე პროფკავშირების თავმჯდომარემ ირაკლი პეტრიაშვილმა განაცხადა.
მისი თქმით, პრემიერმა დღეს სამმხრივი კომისიის სხდომა გამართა, სადაც პროფკავშირებს მიეცათ საშუალება, არსებული პრობლემების შესახებ საკითხები დაეყენებინათ.
პეტრიაშვილმა პრემიერ-მინისტრს მიწოდა ინფორმაცია, საქართველოს ფოსტაში, რკინიგზასა და სხვადასხვა დაწესებულებებში არსებული პრობლემების, კონფლიქტების შესახებ და მიიღო დაპირება პრობლემების უსწრაფესად მოგვარებაზე.
"ყველა ჩვენს ინიციატივას და შენიშვნას პოზიტიური გამოხმაურება მოჰყვა. ამასთან, ვთხოვეთ პრემიერს, რომ შრომის საერთაშორისო დღე საქართველოში უქმე დღედ გამოცხადდეს, რის შემდეგაც პრემიერმა მიმართა დავით სერგეენკოს და მომავალი წლიდან შრომის საერთაშორისო დღე შესაძლებელია უქმე დღე იყოს", - განაცხადა ირაკლი პეტრიაშვილმა.
პარლამენტის ყოფილი შენობის წინ, რუსთაველის გამზირზე ასობით ადამიანია შეკრებილი, რომლებიც სხვადასხვა რეგიონებიდან, მათ შორის, ჭიათურიდან სპეციალურად აღნიშნული აქციისთვის ჩამოვიდნენ.
დღევანდელი აქციის ბოლოს, დაგეგმილია მომღერალ რობი კუხიანიძის კონცერტი, რომელიც საკუთარი რეპერტუარიდან რამდენიმე სიმღერას შეასრულებს მუშების სოლიდარობის ნიშნად.
