დღეს, 30 აპრილს "გიორგი ხუციშვილის სახელობის კონფლიქტების მართვისა და პრევენციის სამხრეთკავკასიური სკოლის" კურსდამთავრებულებს სერთიფიკატები გადაეცათ. როგორც " ჯი-ეიჩ-ენს" "კონფლიქტების და მოლაპარაკებების საერთაშორისო კვლევითი ცენტრიდან" აცნობეს ,სკოლის საპილოტე პროექტის მესამე ეტაპი წარმატებით დასრულდა.
პირველი ორი ეტაპისგან განსხვავებით მესამე ეტაპზე მასტერ კლასები ჩაუტარდათ იმ ჟურნალისტებს, რომლებიც კონფლიქტების სფეროში მოღვაწეობენ და ან სამომავლოდ აპირებენ ამ თემებზე იმუშაონ. როგორც ICCN-ის აღმასრულებელი დირექტორი მაია კაციტაძე აცხადებს პროექტის მიზანი სფეროს ექსპერტებისა და დაინტერესებული ახალგაზრდებისთვის ახალი სივრცის შექმნაა.
"პროექტის მიზანია, სფეროს ექსპერტებისა და დაინტერესებული ახალგაზრდებისთვის ახალი სივრცე შეიქმნას, გამოავლინოს სფეროში მოღვაწე ახალგაზრდა ექსპერტები, რომლებიც კვალიფიკაციის ამაღლებით არიან დაინტერესებულნი. სკოლამ ხელი უნდა შეუწყოს, რეგიონში კონფლიქტოლოგიის, როგორც ერთ-ერთი მნიშვნელოვანი დარგის განვითარებასასა და პოპულარიზაციას. გამოცდილებისა და ცოდნის გაზიარებას ახალგაზრდა თაობისთვის", _განაცხადა მაია კაციტაძემ.
საპილოტე პროგრამა გულისხმობდა: 7 დღიან სასწავლო კურსს. 7 დღიდან თითოეული დღე მიეძღვნა ერთ ექსპერტს, და, შესაბამისად, ექსპერტის მიერ შერჩეულ საკითხს.
მასტერ კლასები მიეძღვნა შემდეგ საკითხებს: ეკონომიკური უსაფრთხოება; კავკასიის კონფლიქტები; კონფლიქტების პრევენცია და დარეგულირება; ქართულ-აფხაზური სამართლებრივი ურთიერთობები. მასტერ-კლასებს ჩაატარებენ საქართველოში ცნობილი სფეროს ექსპერტები, რომელთა შესახებაც ინფორმაციას და კონკრეტული სალექციო კურსის დასახელებებს შერჩეული სტუდენტებმა მიიღეს სწავლის დაწყებამდე.
ლექციები წაიკითხეს საქართველოში შესაბამისი სფეროს ექსპერტებმა: მამუკა არეშიძე, ივლიანე ხაინდრავა, ირაკლი კაკაბაძე, ნინო ჩხობაძე, ლევან გერაძე, ლევან გიგინეიშვილი, ბადრი ნაჭყებია, სანდრო თვალჭრელიძე.
აღსანიშნავია, რომ 2014 წელი კონფლიქტების და მოლაპარაკებების საერთაშორისო კვლევითი ცენტრის საიუბილეო წელია და ცენტრის მიერ 2014 წელს განხორციელებული ყველა პროექტი გიორგი ხუციშვილის ხსოვნისადმი იქნება მიძღვნილი.