თბილისის მერობის კანდიდატი ნიკა მელია და „ერთიანი ნაციონალური მოძრაობის" საარჩევნო შტაბის ხელმძღვანელი გიგი უგულავა დღეს, დედაქალაქში კიდევ ერთი შეჩერებული სამშენებლო ობიექტის ადგილზე იმყოფებოდნენ და პროექტის მნიშვნელობაზე ისაუბრეს.
ნავთლუღში ახალი, თანამედროვე რკინიგზის სადგურის მშენებლობა თბილისის შემოვლითი რკინიგზის პროექტის ფარგლებში იგეგმებოდა. ქალაქში სარკინიგზო ინფრასტრუქტურის შეცვლის შემდეგ, ცენტრალური სადგური უქმდებოდა და ორი ჩიხური სადგური შენდებოდა: აღმოსავლეთ სადგური-ნავთლუღი და დასავლეთ სადგური-დიდუბე. აღმოსავლეთ სადგურის სამშენებლო სამუშაოებს კომპანია „დექსუს დეველოპმენტი" ახორციელებდა.
ნავთლუღში მდებარე სადგური ორ სართულიანი იქნებოდა, რომლის პირველ სართულზე სავაჭრო ცენტრი, ხოლო მეორეზე მოსაცდელი დარბაზი და ადმინისტრაცია განთავსდებოდა.
რკინიგზის სადგურის მშენებლობა, სამგორის რაიონში, კომერციულად ყველაზე დატვირთულ ადგილას დაიგეგმა, შესაბამისად აღნიშნული ტერიტორია თანამედროვე ბიზნეს ცენტრად გადაიქცეოდა, რაც ტერიტორიის განვითარებასა და ახალი სამუშაო ადგილების შექმნას შეუწყობდა ხელს.
სადგურის მშენებლობა შეჩერებულია. ცენტრალური მთავრობის გადაწყვეტილებით, შემოვლითი რკინიგზის მშენებლობა დაკონსერვდა, შესაბამისაც ყველა სამუშაო, რაც პროექტის მიხედვით იგეგმებოდა, აღარ ხორციელდება.