პრემიერ-მინისტრი ირაკლი ღარიბაშვილი ქართველ ძიუდოისტებს ევროპის ჩემპიონობას ულოცავს და მისალოც განცხადებას ავრცელებს, როემლსაც ,,ჯი-ეიჩ-ენი" უცვლელად გთავაზობთ: ,,საფრანგეთში, მონპელიეში საქართველოს დროშა აფრიალდა! ძიუდოს ევროპის ჩემპიონატში ჩვენმა საამაყო ძიუდოისტებმა ტრიუმფალური გამარჯვება მოიპოვეს - საქართველოს ეროვნული ნაკრები ევროპის ჩემპიონი გახდა. ვულოცავ ჩვენს სპორტსმენებს ამ ბრწყინვალე გამარჯვებას!ვულოცავ ინდივიდუალურ შეჯიბრში გამარჯვებას თითოეულ სპორტსმენს - ოქროს მედალოსნებს ვალერი ლიპარტელიანს და ავთანდილ ჭრიკიშვილს, ვერცხლის მედალოსნებს ამირან პაპინაშვილსა და ადამ ოქრუაშვილს.გამარჯვებას ვულოცავ ნაკრების მთავარ მწვრთნელს ირაკლი უზნაძეს და მადლობას ვუხდი ასეთი გუნდის მომზადებისათვის. ქართველი ძიუდოისტების გამარჯვება და მიღწევები უკვე საამაყო ტრადიციად იქცა. მიხარია, რომ მთავრობის განსაკუთრებული თანადგომა და ხელშეწყობა აისახა ჩვენი ძიუდოისტების წარმატებებზე.
მჯერა, ჩვენი სახელოვანი ძიუდოისტები კიდევ ბევრ გამარჯვებას მოიპოვენ და გაახარებენ ქართველს გულშემატკივარს", _ნათქვამია ღარიბაშვილის მილოცვაში.
შეგახსენებთ, რომ საქართველოს ძიუდოს ნაკრები ევროპის ჩემპიონია. გუნდურ ასპარეზობაში ჩვენმა ნაკრებმა რუსეთი დაამარცხა და კონტინენტის საუკეთესო გუნდის ტიტული ზედიზედ მესამედ მოიპოვა.
ქართველმა ძიუდოისტებმა ფინალურ ორთაბრძოლაში რუსეთთან 4:1 გაიმარჯვეს.
გადამწყვეტი შეხვედრები მოიგეს ნუგზარ ტატალაშვილმა, ავთანდილ ჭრიკიშვილმა, ვალერი ლიპარტელიანმა და ადამ ოქრუაშვილმა. ფინალში მხოლოდ შალვა ქარდავა დამარცხდა.
საფრანგეთის ქალაქ მონპელიეში გამართული ევროპირველობა ქართველთა სრული ტრიუმფით დასრულდა. გუნდური პირველი ადგილის გარდა, საქართველოს ნაკრებმა ინდივიდუალურად ორი ოქროსა და ორი ვერცხლის მედალი მოიპოვა.
