რას გულისხმობს ევროკავშირთან ღრმა და ყოვლისმომცველი თავისუფალი ვაჭრობის შეთანხმება, რა ვალდებულებები აქვს აღებული საქართველოს და რა სარგებელს მოუტანს ის ქართველ მეწარმეებს - ამ საკითხებზე დღეს ეროვნულ ბიბლოთეკაში ეკონომიკისა და მდგრადი განვითარების სამინისტროსა და ბიზნესის, კერძო სექტორისა და სამეცნიერო წრეების წამომადგენლებმა იმსჯელეს.
ეკონომიკისა და მდგრადი განვითარების მინისტრის მოადგილემ, მიხეილ ჯანელიძემ ვრცელი პრეზენტაცია წარმოადგინა და მოწვეულ სტუმრებს გააცნო ევროკავშირთან ღრმა და ყოვლისმომცველი თავისუფალი ვაჭრობის შეთანხმების კონკრეტული დეტალები. მისი განცხადებით, ეკონომიკის სამინისტრომ აამოქმედა სპეციალური საინფორმაციო ვებ-პორტალი, სადაც ყველა დაინტერესებული პირი გაეცნობა ევროკავშირთან თავისუფალი ვაჭრობის შეთანხმების ფარგლებში ნაკისრ ვალდებულებებსა და ყველა იმ პირობას, რომელიც საქონლის პრეფერენციულ სავაჭრო რეჟიმში მოქცევას გულისხმობს.
დღევანდელ შეხვედრაზე მოწვეულები იყვნენ ფინანსთა სამინისტროსა და სოფლის მეურნეობის სამინისტროს წარმომადგენლებიც, რომლებმაც საქონლით ვაჭრობასა და საბაჟო საკითხების რეგულაციებზე ისაუბრეს და განმარტეს ის კონკრეტული პროცედურები, რომელთა გავლაც სავალდებულო იქნება ევროკავშირის ბაზრით დაინტერესებული ექსპორტიორებისთვის.
ეკონომიკისა და მდგრადი განვითარების სამინისტრო თემატური შეხვედრების გამართვას რეგიონებში გააგრძელებს, სადაც ადგილობრივი ხელისუფლების, ბიზნესის, კერძო და სამეცნიერო წრეების წარმომადგენლებს უფრო დეტალურ ინფორმაციას მიაწვდის თავიუფალი ვაჭრობის შეთანხმების ფარგლებში დაგეგმილი და განხორციელებული რეფორმების შესახებ.
