HLF ახორციელებს ოფიციალურ სტატისტიკურ მონაცემებზე დაკვირვებას, გააანალიზებს და მომავალში სისტემატურად გამოაქვეყნებს ქვეყანაში ეკონომიკური, კრიმინოგენული, სოციალური, ჯანდაცვის და სხვა სფეროებში არსებული მდგომარეობის შესახებ.
ჩვენი ყურადღება მიიპყრო საქსტატის მიერ 20 მარტს გამოქვეყნებულმა მშპ-ს მონაცემებმა. საქსტატის მონაცემებზე დაყრდნობით მშპ-ს რეალური ზრდა 2013 წლის IV კვარტალში, III კვარტალთან შედარებით 5,7%-ით გაიზარდა. ზრდის ეს ნახტომისებური მაჩვენებლი ბოლო 3 წლის განმავლობაში ყველაზე მაღალია. 2012 წლის ბოლო კვარტლის მშპ-სთან მიმართებაში ზრდამ 7,1% შეადგინა, რაც ფულად გამოხატულებაში 479,7 მლნ ლარს წარმოადგენს.
დარგობრივად მშპ-ში ყველაზე მაღალი, 20,6%-იანი ზრდა „გადამამუშავებელ მრეწველობაში" დაფიქსირდა, 19,6%-იანი - „სასტუმროების და რესტორნების მომსახურებაში", „ტრანსპორტში" - 14,7% და „სოფლის მეურნეობაში" - 12,3%.
საქსტატის მონაცემებით მოცემული 19 დარგობრივი კლასიფიკატორიდან მშპ-ში წილის ზრდა დაფიქსირდა 17, ხოლო კლება - 2 კლასიფიქატორში. კლება მხოლოდ 3,2% იყო „მშენებლობის" დარგში და 2,2% - „სხვა კომუნალური, სოციალური და პერსონალური მომსახურებაში".
მთლიანობაში 2013 წლის IV კვარტალში, 2012 წლის ანალოგიურ პერიოდთან შედარებით მშპ-ს საბაზისო ფასებში ზრდა შეადგენდა 7,7%, ხოლო მშპ საბაზრო ფასებში - 7,1%.
2012-2013 წლების შედარების შემთხვევაშიც ზრდა ფიქსირდება. მშპ-ს რეალური ზრდა 3,2%-ია. წინაწარი მონაცემებით, 2013 წელს მშპ ერთ სულ მოსახლეზე შეადგენს 5 928,6 ლარს, რაც 2%-ით აღემატება 2012 წლის მაჩვენებელს. 10%-ით არის გაზრდილი 2011 წელთან და 27%-ით 2010 წელთან შედარებით.
რაც შეეხება დარგობრივ სტრუქტურას, ისევე როგორც 2012-13 წლების IV კვარტლების შედარებისას, წლიურ მაჩვენებლებშიც დარგობრივი კლასიფიკატორების უმეტესობის ზრდა ფიქსირდება. კერძოდ, 19 კლასიფიკატორიდან, 14 გაზრდილია, 1 სტაბილური და 4 შემცირებული.
მნიშვნელოვანია აღინიშნოს, რომ მთლიანი შიდა პროდუქტის დარგობრივ სრუქტურაში წილობრივად მე-5 ადგილზე „სოფლის მეურნეობა" ფიქსირდება 9,3%-ით, ხოლო პირველ-მეორე ადგილს „ვაჭრობა" (17,3%) და „მრეწველობა" (17,2%) ინაწილებენ. ანალოგიური მდგომარეობაა 2012-13 წლების IV კვარტლების სტრუქტურაში. „სოფლის მეურნეობის" წილი 8,3%-ა და ინარჩუნებს მე-5 პოზიციას, ხოლო პირველ-მეორეზე ისევ 0,1% სხვაობით „ვაჭრობა" (17,8%) და „მრეწველობა" (17,7%) დგანან.