რუმინეთის სამთავრობო დელეგაციამ პრემიერ-მინისტრ ვიქტორ პონტას ხელმძღვანელობით, საქართველოს ერთიანობისთვის დაღუპულ გმირთა მემორიალი გვირგვინით შეამკო.
შესრულდა რუმინეთისა და საქართველოს სახელმწიფო ჰიმნები. ცერემონიაში საპატიო ყარაული მონაწილეობდა.
საქართველოში ოფიციალური ვიზიტის ფარგლებში, დღესვე დელეგაციის წევრები მცხეთაში ჯვრის მონასტერსა და სვეტიცხოველს დაათვალიერებენ, რის შემდეგაც თბილისში, ეროვნულ მუზეუმს ესტუმრებიან.
დღის მეორე ნახევარში, საქართველოსა და რუმინეთის პრემიერ-მინისტრები საქართველო-რუმინეთის სარაგბო მატჩს დაესწრებიან, რომელიც მიხეილ მესხის სახელობის სტადიონზე გაიმართება.
რუმინეთის პრემიერ-მინისტრი, ვიქტორ პონტა, სამთავრობო დელეგაციასთან ერთად, ირაკლი ღარიბაშვილის მოწვევით საქართველოს 14 მარტს ესტუმრა. დელეგაციის შემადგენლობაში არიან რუმინეთის საგარეო საქმეთა, ეკონომიკის, სპორტისა და ახალგაზრდობის საქმეთა მინისტრები, პარლამენტის წევრები, პრემიერ-მინისტრის მრჩევლები და რუმინეთის ოლიმპიური კომიტეტის თავმჯდომარე. ვიზიტის ფარგლებში გაიმართა შეხვედრები საქართველოს პრემიერ-მინისტრთან, მთავრობის წევრებთან, პრეზიდენტთან და პარლამენტის თავმჯდომარესთან. რუმინეთის სამთავრობო დელეგაცია თბილისს დღეს დატოვებს.
