,,საქართველოს ახალგაზრდა კონსტიტუციონალისტთა ასოციაცია" სახელწიფო საკონსტიტუციო კომისიას სახელმწიფო სიმბოლოების დაცვისკენ მოუწოდებს და მოითხოვს აღნიშნული საკითხი გაწერილი არა მარტო ორგანული კანონით, არამედ საქართველოს კონსტიტუციითაც იყოს.
გერბი, ჰიმნი და დროშა, სახელმწიფოს განმსაზღვრელი სიმბოლოებია და მათში იდენტიფიცირებული უნდა იყოს საქართველოს ისტორია. გამომდინარე აქედან მათ საპატიო ადგილი უნდა ჰქონდეთ ქვეყნის უზენაეს კანონში.
საზოგადოებაში დღესაც მუსირებს კრიტიკული მოსაზრებები საქართველოს სახელმწიფო სიმბოლოებთან დაკავშირებით და რიგი საკითხები გადასინჯვასაც საჭიროებს, თუმცა ჩვენი განხილვის ძირითად თემას ამ ეტაპზე გერბის, ჰიმნისა და დროშის მარეგულირებული ნორმების კონსტიტუციური რეგლამენტაცია წარმოადგენს.
საქართველოს კონსტიტუციის მე-11 მუხლის მიხედვით, საქართველოს სახელმწიფო სიმბოლოები დადგენილია ორგანული კანონით, რასაც ერთგვარ პრობლემამდე მივყავართ, რადგან საკითხის ბუნდოვანება და არასრული რეგულირება ქვეყნის უზენაეს კანონში, სახელმწიფო ორგანოების, კერძო თუ საჯარო სამართლის იურიდიული და ფიზიკური პირების მხრიდან დარღვევის წინაპირობას ქმნის. სახელმწიფო სიმბოლოების შებღალვის არაერთი ფაქტი დაფიქსირდა, თუმცა არ არსებობს ქმედითი სამართლებრივი ბერკეტი, რითაც ამ ფაქტის სანქცირება მოხდება.
აგრეთვე ყურადსაღებია სხვა ქვეყნების გამოცდილებაც. კერძოდ: საფრანგეთის, გერმანიის, პოლონეთის, ჩეხეთის,უნგრეთის,უკრაინისა და თურქეთის კონსტიტუციებში მკაფიო ჩანაწერი გვხვდება სახელმწიფო სიმბოლოებთან დაკავშირებით, რასაც ვერ ვიტყვით საქართველოს კონსტიტუციაზე. ჩვენს შემთხვევაში საქართველოს გერბი, ჰიმნი და დროშა ორგანული კანონით რეგულირდება და კონსტიტუციაში გაწერილი არ არის.
,,ახალგაზრდა კონსტიტუციონალისტთა ასოციაცია" მოითხოვს უფრო ეფექტური სამართლებრივი გარანტიები შეიქმნას და აღარ დაფიქსირდეს სახელმწიფო სიმბოლოების შებღალვის ფაქტი. აგრეთვე ასოციაცია მზადყოფნას გამოთქვამს სახელმწიფო საკონსტიტუციო კომისიასთან აქტიურად ითანამშრომლოს და მას შესაბამისი კონსტიტუციური კანონის პროექტი წარუდგინოს.