პარლამენტი მზად არის ბიზნესთან ურთიერთობის ახალ სტანდარტზე გადავიდეს, აღნიშნულის შესახებ ცნობილი პარლამენტის თავმჯდომარისა და საქართველოს ბიზნეს ასოციაციის წევრებს შორის გამართული შეხვედრისას გახდა, რომელიც სასტუმრო "ქორთიარდ მერიოტში" გაიმართა. შეხვედრაზე დავით უსუფაშვილმა პარლამენტსა და ბიზნესს შორის ურთიერთობის საკითხებზე ისაუბრა. ,,ურთიერთობა პარლამენტსა და ბიზნეს წრეებს შორის არ შემოიფარგლება და არ იქნება მხოლოდ კონკრეტულ კანონპროექტთან ან კონკრეტულ პრობლემასთან დაკავშირებით. ეს არის პრაქტიკულად სრული სპექტრი იმ საკითხებისა, რომელიც ქვეყანას აღელვებს", - აღნიშნა პარლამენტის თავმჯდომარემ.
დავით უსუფაშვილის თქმით, წარმატებული ბიზნესმენების მოსაზრებები საინტერესოა როგორც პარლამენტისთვის, ასევე მთლიანად საზოგადოებისთვის. მანვე აღნიშნა, რომ პარლამენტი მზად არის გადავიდეს ბიზნესთან ურთიერთობის ახალ სტანდარტზე, რომელიც ბიზნეს ასოციაციის წევრებს კანონპროექტების განხილვის პროცესში უფრო ინტენსიურ მონაწილეობას უზრუნველყოფს. შეხვედრაზე განხილული იყო საქართველოს ბიზნეს ასოციაციის მიერ ჩატარებული სამუშაოები და წარმოდგენილი იყო ორგანიზაციის მიერ შემუშავებული 12- პუნქტიანი ეკონომიკური დეკლარაცია. შეხვედრის მონაწილეებმა მოისმინეს ასოციაციის კომიტეტების ანგარიშები. ანგარიშების მოსმენის შემდეგ, შეხვედრა კითხვა-პასუხის რეჟიმში წარიმართა.
,,მოვისმინეთ ანგარიშები საგადასახადო საკითხებზე, კერძო არბიტრაჟზე, ფასიან ქაღალდებზე, სოფლის მეურნეობის საკითხებზე, საბანკო სექტორზე. ყველა ეს თემა მოსაგვარებელია და წინ წასაწევია, რათა ქართულმა ეკონომიკამ უფრო სწრაფი ტემპებით განაგრძოს წინსვლა. ჩვენ ვისაუბრეთ მომავალზეც. ევროპასთან ასოცირების ხელშეკრულება, ევროპასთან სავაჭრო ურთიერთობების გაღრმავება ერთი მხრივ საქართველოს მოუტანს მეტ შესაძლებლობას ინვესტიციებისთვის, წვდომას ევროპის ბაზარზე, მაგრამ ამავე დროს მოუტანს მეტ კონკურენციას. ამისთვის ქართველი ბიზნესმენები მზად უნდა იყვნენ. ამიტომ, ჩვენ შევთანხმდით, რომ ევროპასთან ინტეგრაციის პროცესში ბიზნეს საზოგადოება ჩართული იქნება, რომ მათი რეკომენდაციებიც გავითვალისწინოთ და მათაც ჰქონდეთ დროული ინფორმაცია პოლიტიკურ გადაწყვეტილებებზე", - განაცხადა დავით უსუფაშვილმა შეხვედრის დასრულების შემდეგ ჟურნალისტებთან საუბრისას. მისივე თქმით, ბიზნეს ასოციაციის მიერ მომზადებულ ეკონომიკურ დეკლარაციაშიც ჩამოთვლილია ის პრინციპები, რომელიც ორგანიზაციის მოსაზრებით უნდა გახდეს ხელისუფლებისთვის სახელმძღვანელო პრინციპებად ეკონომიკური პოლიტიკის გატარებაში. ,, შესაძლოა ვიფიქროთ იმაზე, რომ ეს დეკლარაცია შემდგომი მუშაობის შედეგად იქცეს პარლამენტსა და ბიზნეს ასოციაციას შორის ურთიერთობის საფუძვლადაც", -აღნიშნა პარლამენტის თავმჯდომარემ.
ბიზნეს ასოციაციის წევრებთან გამართულ შეხვედრაში მონაწილეობდნენ პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე ზურაბ ტყემალაძე, საფინანსო-საბიუჯეტო კომიტეტის თავმჯდომარე დავით ონოფრიშვილი და აგრარულ საკითხთა კომიტეტის თავმჯდომარის პირველი მოადგილე გელა სამხარაული. პარლამენტის წარმომადგენლებსა და საქართველოს ბიზნეს ასოციაციას შორის შეხვედრა მსგავს ფორმატში უკვე მეორედ გაიმართა და მასში 80-მდე წამყვანი ბიზნესმენი მონაწილეობდა.
