„რომპეტროლ საქართველოს" გენერალური დირექტორის პოზიციაზე სერიკ სალიკოვი დაინიშნა.
როგორც კომპანიის მენეჯმენტში განმარტავენ, ახალი გენერალური დირექტორი სერიკ სალიკოვი, რომპეტროლ ჯგუფში 2013 წლის ივნისიდან მუშაობს. ახალ პოზიციაზე დანიშვნამდე იგი „რომპეტროლ საქართველოს" გენერალური დირექტორის პირველი მოადგილის პოზიციას იკავებდა.
საქართველოში ჩამოსვლამდე, სერიკ სალიკოვი 20 წელზე მეტი ხნის განმავლობაში დსთ-ს ქვეყნებში, ნავთობგაზის სხვადასხვა სამრეწველო კომპანიებში მმართველ თანამდებობდებს იკავებდა. სერიკ სალიკოვს დიდი გამოცდილება აქვს სამშენებლო სფეროშიც, სადაც წლების განმავლობაში ხელმძღვანელ პოზიციებზე მუშაობდა.
„კომპანია „რომპეტროლი" უკვე მეცხრე წელიწადია, საქართველოს ბაზარზე სტაბილურად და წარმატებით ვითარდება. ჩვენ მომავალშიც განვაგრძობთ ამ კურსს - ბენზინგასამართი სადგურების ქსელის განახლებას და გაფართოვებას, მომსახურების გაუმჯობესებას და მომხმარებლისთვის მაღალი ხარისხის ევროპული საწვავის მიწოდებას." - ახცადებს სერიკ სალიკოვი.
კომპანიაში აღნიშნავენ, რომ 2005 წლიდან მოყოლებული, სერიკ სალიკოვი „რომპეტროლ საქართველოს" მეხუთე გენერალური დირექტორია.
განათლებით ფინანსისტ-ეკონომისტს და ისტორიკოსს სერიკ სალიკოვს, გააჩნია კარაგანდის უნივერსიტეტის ეკონომიკის და ისტორიის ფაკულტეტების დიპლომი. ასევე ფლობს მოსკოვის ფინანსური აკადემიის დიპლომს ფინანსების მართვის სპეციალობით.
საკადრო ცვლილებებამდე რომპეტროლს ნურკენ მურზაგალიევი მართავდა.
ტრანსნაციონალური კომპანია "რომპეტროლი" საქართველოს ბაზარზე ევრო სტანდარტის საწვავის უმსხვილეს მომწოდებელს წარმოადგენს. "რომპეტროლ ჯგუფის" მთავარი ოფისი ამსტერდამში მდებარეობს და ამჟამად მსოფლიოში 50-მდე კომპანიას აერთიანებს. ამჟამად "რომპეტროლი" საქართველოს ბაზარზე 5 ტიპის საწვავს ყიდის. სამი ტიპის ბენზინს - Euro Regular, Efix Euro Premium, Efix S და ორი სახეობის დიზელს - Efix Euro Diesel და Euro Diesel.