14 თებერვალს, საქართველოს სოციალურ-ეკონომიკური განვითარების სტრატეგიის „საქართველო 2020-ის" პროექტი საქართველოს ფინანსთა მინისტრის მრჩეველთა საბჭოს სხდომაზე განიხილეს. სხდომას საქართველოს ფინანსთა მინისტრი ნოდარ ხადური დაესწრო.

სტრატეგიაში ასახულია ის მექანიზმები და ინდიკატორები, რომელმაც უნდა უზრუნველყოს ქვეყანაში ყოვლისმომცველი ეკონომიკური ზრდა, მათ შორისაა: კერძო სექტორის კონკურენტუნარიანობისა და ფინანსებზე ხელმისაწვდომობის ზრდის ხელშეწყობა, ადამიანური კაპიტალის განვითარება, აგრეთვე, ამ მიზნის მისაღწევად აუცილებელი წინაპირობების შენარჩუნება, როგორიცაა: მაკროეკონომიკური სტაბილურობა, საბიუჯეტო ხარჯების ეფექტიანობა, ეფექტიანი სახელმწიფო მმართველობა.

შეხვედრაზე ფინანსთა მინისტრმა ნოდარ ხადურმა მადლობა გადაუხადა ყველას, ვინც ჩართული იყო აღნიშნული დოკუმენტის მომზადებაში, მათ შორის, საერთაშორისო დონორ ორგანიზაციებს, განსაკუთრებით, მსოფლიო ბანკს, რომელმაც უზრუნველყო დოკუმენტის ინგლისურ ენაზე თარგმნა.

„ექსპერტები მაისიდან არიან ჩართულები აღნიშნული დოკუმენტის შემუშავებაში. მასში ასახულია მიღწევის გზებიც. ჩვენ მიღწევის გზებს არა მხოლოდ ვწერთ, არამედ ვასრულებთ - ბიზნესი გავათავისუფლეთ ზეწოლისგან და არ ვართმევთ ქონებას, გავხსენით ახალი საექსპორტო ბაზრები, ევროკავშირთან დამყარდება თავისუფალი ვაჭრობის რეჟიმი და გვექნება ახალი შესაძლებლობები. ჩვენ ნაბიჯ-ნაბიჯ ვიხილავდით პროცესებს, რომლებიც სტრატეგიის შემუშავებას ეხებოდა. დღესაც გამოითქვა გარკვეული შენიშვნები, მათ შორის, პროგნოზების დაზუსტებასთან დაკავშირებით. ასე რომ, ძალიან მალე დოკუმენტი საბოლოო სახეს მიიღებს და გამოქვეყნდება," - განაცხადა ფინანსთა მინისტრმა ნოდარ ხადურმა.

შეხვედრაზე მრჩეველთა საბჭოს წევრებმა გამოთქვეს საკუთარი წინადადებები და მოსაზრებები სტრატეგიის პროექტის შესახებ.

„შეიძლება ითქვას, რომ ბოლო 10 წელიწადია, მთავრობას არ მოუმზადებია მსგავსი დოკუმენტი, რომელიც მოიცავს ხედვას, თუ როგორ უნდა განვითარდეს ქვეყნის ეკონომიკა. ის თვისობრივად განსხვავდება წინა ეტაპზე მომზადებული დოკუმენტებისგან. სტრატეგიის პროექტი ასახავს რამდენიმე მნიშვნელოვან მომენტს: პირველი - ქვეყანა უნდა იყოს ინოვაციურ ეკონომიკაზე დაფუძნებული, მეორე - მისი ვექტორი არის ევროინტეგრაცია, ევროკავშირთან თავისუფალი და ყოვლისმომცველი ვაჭრობის შეთანხმება და მის ბაზაზე საქართველოს ეკონომიკის განვითარება. დოკუმენტში წარმოდგენილი პროგნოზები დღევანდელი გადმოსახედიდან რეალისტურია, თუმცა, ამავე დროს, აუცილებელია ამ პროგნოზების მუდმივი განახლება და დაზუსტება", - განაცხადა მრჩეველთა საბჭოს წევრმა თსუ-ს რექტორმა, ლადო პაპავამ.

„ძალიან მნიშვნელოვანია, რომ დოკუმენტი დამყარებულია სამ ძირითად კომპონენტზე: კონკურენტუნარიანობა, ანუ წარმოებაზე, რომელიც კონკურენტუნარიანი უნდა იყოს როგორც ქვეყნის შიგნით, ისე ქვეყნის გარეთ, ადამიანური კაპიტალის გამოყენებაზე, რაც ნიშნავს ცოდნაზე დამყარებული ეკონომიკის განვითარებას და მესამე, ესაა ფინანსური უზრუნველყოფის პრობლემის მოგვარება, რათა ფულადი სახსრები თანაბრად ხელმისაწვდომი იყოს ბიზნესისთვის, საზოგადოებისთვის" - აღნიშნა მრჩეველთა საბჭოს წევრმა, თსუ-ს პროფესორმა იაშა მესხიამ.

„ვთვლით, რომ საკმაოდ კარგი დოკუმენტია, გამომდინარე იქიდან, რომ მასში ასახულია ყველა ის პრიორიტეტი, რაც სჭირდება ქვეყანას. დოკუმენტში ასახულია მიღწევის გზებიც. მთავარია, მთავრობის ეფექტური მოქმედებები, რათა ეს რეალისტური მიზნები იყოს რეალიზებული, - განაცხადა მრჩეველთა საბჭოს წევრმა, "ჯორჯიან ბიზნეს & პოლითიქალ ინსაითის" (BPI) დირექტორმა, ირაკლი ლექვინაძემ.

„პროცესი, რომელიც დღეს მიმდინარეობს ძალიან მნიშვნელოვანია. ვთვლი, რომ ჩვენ ძალიან მალე გვექნება სტრატეგიული დოკუმენტი, რომელიც განსაზღვრავს ქვეყნიის უახლოესი წლების განვითარების კონცეფციას. რეალურად მისი განხორციელებაც უფრო თვალსაჩინოს გახდის იმ მიმართულებას, რაც საქართველოს ეკონომიკას და სოციალურ სფეროს გააჩნია," - განაცხადა ანალიტიკური ცენტრის, „ეკონომეტრის" დირექტორმა რეზო საყევარიშვილმა.

პროექტის ფართო საზოგადოებისთვის წარსადგენად და საჯარო განხილვისთვის საქართველოს ფინანსთა, ეკონომიკისა და მდგრადი განვითარების სამინისტროებმა დოკუმენტი უწყებების ოფიციალურ ვებ-გვერდებზე გამოაქვეყნეს. ქვეყნის სოციალურ-ეკონომიკური განვითარების სტრატეგიას საქართველოს მთავრობა სწორედ საჯარო განხილვების შემდეგ დაამტკიცებს.

ქვეყნის სოციალური და ეკონომიკური განვითარების სტრატეგიის შექმნაზე მუშაობა გასულ წელს ფინანსთა და ეკონომიკისა და მდგრადი განვითარების სამინისტროებმა საქართველოს პრემიერ-მინისტრის დავალებით დაიწყეს.

ქვეყნის სოციალური და ეკონომიკური განვითარების სტრატეგიის პროექტი ყველა სამინისტროს, ექსპერტების, ეროვნული ბანკის, ბიზნეს სექტორისა და საერთაშორისო საზოგადოების აქტიური მონაწილეობით შემუშავდა.
ამჟამად, დოკუმენტის პროექტის ნახვა შესაძლებელია ფინანსთა სამინისტროს ოფიციალურ ვებ-გვერდზე www.mof.ge და ეკონომიკისა და მდგრადი განვითარების სამინისტროს ოფიციალურ ვებ-გვერდზე www.economy.ge