13 თებერვალს, საქართველოს ფინანსთა მინისტრი ნოდარ ხადური შეხვდა თურქეთის რესპუბლიკის ახალ საგანგებო და სრულუფლებიან ელჩს საქართველოში ლევენთ გურმუქჩუს.
შეხვედრა გაცნობითი ხასიათის იყო. მხარეებმა ისაუბრეს ორ ქვეყანას შორის ურთიერთობებში ისეთ პრიორიტეტულ მიმართულებებზე როგორებიცა: საქართველოსა და თურქეთს შორის სავაჭრო-ეკონომიკური პარტნიორობის ინტენსიფიკაცია, საბაჟო-გამშვები პუნქტების ეფექტური მართვა, ტურისტული და სატრანსპორტო ნაკადის ზრდა და სხვა.
შეხვედრაზე განსაკუთრებული ყურადღება დაეთმო საბაჟო-გამშვები პუნქტების ერთობლივად მართვის ეფექტურად გამოყენების მექანიზმების შემუშავებას.
როგორც ცნობილია, გასული წლის ნოემბერში, თურქეთმა დაიწყო ახალი საბაჟო-გამშვები პუნქტის „ჩილდირ/აქთაშის" მშენებლობა. პარალელურად, მიმდინარე წლის აგვისტოში, ქართული მხარე დაასრულებს საბაჟო-გამშვები პუნქტის „კარწახი" რეკონსტრუქციას, რითაც რეგიონის სოციალურ-ეკონომიკური განვითარების ახალი შესაძლებლობა შეიქმნება. ასევე ცნობილია, რომ თურქეთის მხარე გეგმავს სარფის საბაჟო-გამშვებ პუნქტთან, თურქეთის ტერიტორიაზე ინფრასტრუქტურის გაფართოებას.
შეხვედრაზე მხარეებმა საბაჟო სფეროში პარტნიორობისა და მისი შემდგომი განვითარების შესახებ ისაუბრეს.
მასალის გამოყენების პირობები
