მთავრობის დღევანდელ სხდომაზე მინისტრთა კაბინეტის შემადგენლობამ ჯანდაცვის სამინისტროს მიერ ინიცირებული დადგენილების პროექტი ,,მაღლი რისკის შემცველი სამედიცინო საქმიანობის ტექნიკური რეგლამენტის დამტკიცების შესახებ" მოიწონა. როგორც მთავრობის სხდომის დასრულების შემდეგ ჯანდაცვის მინისტრის პირველმა მოადგილემ დიმიტრი მახათაძემ განაცხადა, პირველი მაისიდან სტომატოლოგიური კლინიკები ვალდებული იქნებიან მათი საქმიანობის შესახებ რეგულირების სააგენტოს აცნობონ.
,,პირველი მაისიდან სტომატოლოგიური კლინიკები ვალდებული იქნებიან შეატყობინონ რეგულირების სააგენტოს თავიანთი ფუნქციონირების და საქმიანობის შესახებ. ასევე სავალდებულო იქნება ერთ სტომატოლოგიურ სავარძელზე დაცული იყოს მინიმალური ფართი, რაც რეგლამენტითაა განსაზღვრული. შესაბამისად თითოეულ დამატებით სავარძელზე ასევე რეგლამენტით განსაზღვრულია შესაბამისი ფართი" , _განაცხადა დიმიტრი მახათაძემ.
მისივე განმარტებით, ახალი რეგულაციები თანახმად, სტომატოლოგიურ კლინიკებში შეზღუდული შესაძლებლობის მქონე პირებისთვის თავისუფლად გადაადგილების საშუალებებიც უნდა არსებობდეს.
მისივე განმარტებით, აღნიშნული რეგულაციების შემოღება სტომატოლოგიური მომსახურების გაძვირებას არ გამოიწვევს.