აჭარის მთავრობა, ბუნგალოს 20 წლით ასხვისებს. როგორც აუქციონის პირობებიდან ირკვევა, აჭარის ეკონომიკისა და მდგრადი განვითარების სამინისტრო ელექტრონულ აუქციონზე ზღვისპირა პარკში მდებარე 1127 კვ.მ (კაფე-ბარი ბუნგალო) არასასოფლო-სამეურნეო დანიშნულების მიწის ნაკვეთს 20 წლით გასცემს. აუქციონში გამარჯვებული ვალდებულია ყოველწლიურად 65 ათასი, ან უფრო მეტი თანხა გადაუხადოს, რადგანაც ახალი მფლობელის მიერ ყოველწლიურად გადასახდელი თანხის საწყისი ღირებულება 65 ათასი ლარია. აუქციონი კი 30 იანვრისთვისაა ჩანიშნული.
აუქციონის პირობების თანახმად, მფლობელი ვალდებულია, 2014 წლის 1-ელი ივლისისათვის სარგებლობაში გადაცემულ ქონებაზე საზოგადოებრივი დანიშნულების ობიექტის აამოქმედოს და ასევე სარგებლობის პერიოდში ობიექტს პროფილი შეუნარჩუნოს, სეზონურად - წელიწადში არანაკლებ 3 თვე.
ასევე, სარგებლობის პერიოდის ვადის გასვლის შემდეგ ქონებაზე არსებული ყველა გაუმჯობესება აღირიცხება აჭარის ავტონომიური რესპუბლიკის საკუთრებად და მოსარგებლეს არ აუნაზღაურდება მის მიერ გაწეული ხარჯები.
