განათლების სამინისტრო მანდატურებთან დაკავშირებით განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: ,,მანდატურის სამსახურის რეფორმა პილოტური პროექტის ფარგლებში წარმატებით განხორციელდა. სამსახურს ფსიქოლოგიური ცენტრებისა და კარიერის დაგეგმვის ფუნქციები დაემატა. შესაბამისად, სამსახური სკოლას კომპლექსურ მომსახურებას გაუწევს. წლის განმავლობაში, რეფორმაზე მუშაობის პროცესში, იმართებოდა დისკუსიები სხვადასხვა ფოკუს ჯგუფებში, პრეზენტაციები ჩატარდა, მოეწყო განხილვები სატელევიზიო ეთერში. რეფორმიდან გამომდინარე ზოგადი განათლების შესახებ კანონში ცვლილებები მომზადდა, რომელიც მთავრობამ მოიწონა და შესაბამისად, კანონპროექტი პარლამენტში განსახილველად შევიდა. რაც შეეხება მიმდინარე ცვლილებას, რომლის მიხედვითაც, 2014 წლიდან მანდატურს სამსახურში სკოლა ნიშნავს, აღნიშნული ცვლილებები კანონში 2012 წლის 27 დეკემბერს შევიდა. მიმდინარეობს პროცედურული საკითხების დასრულება, რომ საკანონმდებლო მოთხოვნა აღვასრულოთ. ამ ეტაპზე ფუნქციურად არაფერი იცვლება. ასევე გუშინ გავრცელდა ინფორმაცია, რომ სკოლის მანდატურებს სამსახურიდან გათავისუფლების თაობაზე ინფორმაცია სოციალური ქსელით (skype) გაეგზავნათ, რაც ასევე სინამდვილეს არ შეესაბამება. განათლების სამინისტრო კომუნიკაციისათვის ოფიციალურ ელექტრონულ საქმისწარმოების სისტემას იყენებს", - ნათქვამია განათლების სამინისტროს განცხადებაში.
შეგახსენებთ, რომ მანდატურებმა გუშინ საპროტესტო აქცია გამართეს და განათლების სამინისტროსგან ახსნა-განმარტება მოითხოვეს.
