2015 წლის 1-ელი მარტიდან საქართველოში რეგისტრირებული ყველა კატეგორიის ავტოსატრანსპორტო საშუალება გზისთვის ვარგისობაზე სავალდებულო პერიოდულ ტესტირებას დაექვემდებარება. როგორც დღეს მთავრობის კანცელარიაში გამართულ ბრიფინგზე, ეკონომიკისა და მდგრადი განვითარების მინისტრის მოადგილემ ნათია მიქელაძემ განმარტა, დღეის მდგომარეობით, რეგისტრირებულია დაახლოებით 900 ათასამდე მსუბუქი ავტოსატრანსპორტო საშუალება და ეს რიცხვი 2015 წლის 1-ელ მარტამდე სავარაუდოდ გაიზრდება. უახლოეს თვეებში, შსს მომსახურების სააგენტო ჩამოაყალიბებს იმ ნორმებს და სტანდარტებს, რომლის მიხედვითაც ინსპექტირება განხორციელდება, სადაც გათვალისწინებული იქნება საქართველოში არსებული მდგომარეობა.
„ასოცირების ხელშეკრულების ფარგლებში, საქართველოს აღებული აქვს ვალდებულება, რომ ყველა ავტომობილის ტექნიკური მდგომარეობა ევროსტანდარტებთან მოვიდეს შესაბამისობაში, რაც თავის მხრივ, გაზრდის საგზაო მოძრაობის უსაფრთხოებას და დადებითად აისახება გარემოს დაცვაზე. გარდა ამისა, შესაბამისი მოთხოვნების დაკმაყოფილების შემთხვევაში, საქართველოში რეგისტრირებული ავტომანქანები შეუფერხებლად შეძლებენ საერთაშორისო საგზაო მოძრაობაში ჩართვას.
ჩვენ ამ ვალდებულების შესრულების მიზნით, მოლაპარაკებებს ვაწარმოებთ საერთაშორისო ოპერატორთან. საყურადღებოა, რომ საქართველოს ბაზარზე შემოსვლის ინტერესი გამოხარა ტექნიკური უსაფრთხოებისა და სერთიფიცირების სფეროში ევროპის ერთ-ერთმა ყველაზე წარმატებულმა საერთაშორისო კომპანია TUV Rheinland Group-მა"- განაცხადა მინისტრის მოადგილემ.
როგორც მიქელაძე აცხადებს, კომპანია TUV Rheinland Group-ს საქმიანობის 140 წლიანი გამოცდილება გააჩნია და კომპანია დღეისათვის მოიცავს 500 მეტ ფილიალს მსოფლიოს 61 ქვეყანაში. კომპანიის წლიური ბრუნვა კი 1,3 მლრდ ევროს შეადგენს.
როგორც ცნობილი ხდება, საერთაშორისო ოპერატორმა საქართველოს უპირატესობა მიანიჭა იქედან გამომდინარე, რომ ტესტირების პროცესი გარანტირებულად დადგენილ დროში დაიწყება.
აღსანიშნავია, რომ მთავრობამ უკვე მიიღო გადაწყვეტილება, რომ ავტომობილების ტექნიკური დათვალიერების შემოღებაზე მუშაობა დაიწყოს.
საქართველოში ატმოსფერული ჰაერის დაბინძურების ძირითადი წყარო სატრანსპორტო საშუალებების გამონაბოლქვია. მისი წილი ქვეყნის მთლიან გაფრქვევებში დაახლოებით 71%-ს შეადგენს. ავტოტრანსპორტიდან ატმოსფერული ჰაერის დაბინძურების კუთხით ყველაზე მწვავე მდგომარეობა თბილისშია, სადაც ცხოვრობს ქვეყნის მოსახლეობის დაახლოებით 1/3 და თავმოყრილია მთლიანი სატრანსპორტო საშუალებების 40%, რომლის წილი ქალაქის დაბინძურებაში 95%-ზე მეტია.
აღსანიშნავია, რომ მსუბუქი ავტოსატრანსპორტო საშუალებებიდან, რომლებიც საავტომობილო პარკის დაახლოებით 80%-ს შეადგენს, ატმოსფერული ჰაერის დაბინძურების რეგულირება საქართველოში ბოლო 9 წლის განმავლობაში არ ხორციელდება, რადგან 2004 წლიდან მათთვის ტექნიკური მდგომარეობის განსაზღვრის მიზნით გზისთვის ვარგისობაზე ტესტირება ნებაყოფლობითია.
„ქვეყანაში კატასტროფულადაა მომატებული ონკოლოგიურ დაავადებათა მაჩვენებელი. ჰაერის დაბინძურება განსაკუთრებით მოქმედებს ბავშვებზე. ავტომანქანების ტექნიკური გაუმართაობა, გარდა ჰაერის დაბინძურებისა, მოქმედებს ავტოსაგზაო შემთხვევების რაოდენობისა და სიცოცხლის რისკის ზრდაზე. შსს-ს ინფორმაციით, ტექნიკური გაუმართაობის მიზეზით, ათასობით ავარია ხდება, რომელთა დიდი ნაწილი მძიმე დაზიანებებით ან ლეტალური შედეგებით სრულდება.
ყოველივე ზემოაღნიშნულიდან გამომდინარე საქართველოს მთავრობამ მიიღო გადაწყვეტილება ავტოსატრანსპორტო სფეროს ოპტიმიზაციისთვის ეტაპობრივი რეგულაციების შემოღების თაობაზე. ამ მიზნით, მოლაპარაკებები მიმდინარეობდა მსოფლიოში ყველაზე გამოცდილ და ავტორიტეტულ საერთაშორისო კომპანიებთან. ამ ეტაპზე გადაწყვეტილია , რომ საქართველოში შემოდის ევროპული „ხარისხის ნიშანი" - ასოციაცია TUV -ი, რომლიც ჩაერთვება ტექნიკური დათვალიერების სისტემის დანერგავში. ამავე დროს, მიმდინარეობს მოლაპარაკება TUV -ის სხვა სფეროებში ჩართვასთან დაკავშირებით, როგორიცაა ექიმების კვალიფიკაციის ამაღლება, მასწავლებლების გადამზადება და სხვა"- ნათქვამია მთავრობის მიერ გავრცელებულ პრესრელიზში.
როგორც მთავრობაში მიიჩნევენ, მთავრობის ეს გადაწყვეტილება უდიდესი მნიშვნელობისაა მოქალაქეთა ჯანმრთელობის, ჯანსაღი გარემოს შექმნისა და სიცოცხლისათვის საშიში რისკების შემცირების უზრუნველყოფისათვის. წინასწარი პროგნოზით, სისტემის ამოქმედებიდან ერთ წელიწადში მავნე გამონაბოლქვის ზემოქმედება შემცირდება 25 პროცენტით. მომდევნო წლებში, თანმიმდევრული, კომპლექსური ღონისძიებების ერთობლიობით.