ციტრუსის ნატურალური წვენები LIVO-ს პირველი პარტია რუსეთში გაიგზავნა, წინასწარი შეთანხმება სავაჭრო კომპანია Амарант გასულ წელს შედგა. პირველ ეტაპზე რუსეთში კომპანიამ 30000 ერთეული 1 ლიტრიანი და 250 გრამიანი ბოთლი გააგზავნა. შემდეგ ეტაპზე დაგეგმილია 90 000 ბოთლის ექსპორტირება.
,,ეს ძალიან მნიშვნელოვანი შეთანხმებაა, პროდუქციამ ყველა შესაბამისი მოთხოვნა დააკმაყოფილა, პირველ ეტაპზე პროდუქცია მოსკოვთან ახლოს მდებარე ქალაქში ხიმკიში გაიყიდება, კომპანია Амарант-ის მაღაზიების ქსელებში. იმედი გვაქვს პროდუქცია მომხმარებელში პოპულარობას მალე მოიპოვებს"- აცხადებენ კომპანიაში.
ქართულ ბაზარზე LIVO გასული წლის აპრილიდან შემოვიდა, ამ დროსათვის იწარმოება 9 პოზიცია - ლიმონი, ფორთოხალი, წითელი ფორთოხალი, ატამი ციტრუსით, ატამი, ალუბალი, შინდი, პომიდორი და ქლიავი. ნატურალური წვენები აჭარაში, ,,ციტროს'' ქარხანაში იწარმოება, რომელიც ,,მილენიუმის'' პროგრამის ფარგლებში შეიქმნა. საწარმო ერთადერთია საქართველოში, რომელსაც ციტრუსის დამუშავება თანამედრო ტექნოლოგიების საშუალებით შეუძლია.
,,წვენები საქართველოში მოყვანილი ციტრუსის და ხილის პროდუქციით იწარმოება და პირდაპირი გამოწურვის მეთოდით არის მიღებული, რაც უზრუნველყოფს ხილის ყველა ვიტამინის და სასარგებლო თვისების შენარჩუნებას. წვენებს განსაკუთრებული არომატი აქვს და თითქმის ფრეშის სეგმენტში გადის'' - აცხადებენ კომპანიაში.
LIVO ,,აირჩიე ქართულის'' სავაჭრო ნიშნით იწარმოება, რომელიც ,,გაყიდვების მართვის კომპანიის'' მიერ არის შექმნილი. სარეალიზაციო ქსელში ყველა სახეობის წვენი 1 ლიტრიან შეფუთვაში 4 ლარამდე ღირს.
