შსს-ს კახეთის სამხარეო მთავარი სამმართველოს თანამშრომლებმა 1977 წელს დაბადებული იოსებ ს, 1969 წელს დაბადებული ეკა ფ. და 1953 წელს დაბადებული ტარიელ კ. ნარკოტიკული საშუალების უკანონო შეძენა-შენახვის და გასაღების ბრალდებით დააკავეს.
სამართალდამცველებმა ეკა ფ. ოპერატიული ინფორმაციის საფუძველზე ჩატარებული საგამოძებო ღონისძიების შედეგად წნორში, აღმაშენებლის ქუჩაზე იმ დროს დააკავეს, როდესაც მან იოსებ ს-ს 300 ლარის სანაცვლოდ 8 ამპულა „მორფინი" გადასცა. ეკა ფ-ს პირადი ჩხრეკისას კიდევ 12 ამპულა „მორფინი" ამოიღეს.
გამოძიებამ დაადგინა, რომ აღნიშნული ნარკოტიკული საშუალება ეკა ფ-მ ტარიელ კ-სგან შეიძინა. სამართალდამცველებმა ტარიელ კ. ოპერატიულ-საგამოძებო ღონისძიების შედეგად იმავე დღეს თელავში დააკავეს.
ნარკოლოგიურმა ექსპერტიზამ დაადგინა, რომ დაკავებისას იოსებ ს. ნარკოტიკული ნივთიერების ზემოქმედების ქვეშ იმყოფებოდა.
სამივე ბრალდებული აღიარებს ჩადენილ დანაშაულს.
გამოძიება ნარკოტიკული საშუალების უკანონო შეძენა-შენახვის და გასაღების ფაქტზე მიმდინარეობს (საქართველოს სსკ-ის 260-ე მუხლის 1-ლი ნაწილით).