სსიპ ლევან სამხარაულის სახელობის სასამართლო ექსპერტიზის ეროვნული ბიურო ნებისმიერი სახის ავტოსატრანსპორტო საშუალებისა და სპეცტექნიკის მიმართულებით მოსახლეობას მრავალმხრივ სერვისს სთავაზობს. მიუხედავად იმისა, რომ საქართველოში სატრანსპორტო საშუალებებზე სერვისებს განახორციელებს არაერთი სერვის ცენტრი, სამხარაულის სახელობის სასამართლო ექსპერტიზის ეროვნული ბიურო ერთადერთი ავტორიტეტული საექსპერტო დაწესებულებაა, რომელიც ახორციელებს მაღალკვალიფიციურ კვლევას და შედეგად გასცემს დასკვნას. იმ სერვისებთან ერთად, რომელსაც ბიურო ავტოსატრანსპორტო საშუალებების მიმართულებით ახორციელებს, მოსახლეობისთვის განსაკუთრებით საინტერესო და მნიშვნელოვანია ისეთი მომსახურებები როგორიცაა:
ავარიული სიტუაციის შდეგად ავტოსაგზაო შემთხვევის მექანიზმის განსაზღვრა:
ბიურო ერთადერთი საექსპერტო დაწესებულებაა, რომელსაც უკვე რამდენიმე წელია გააჩნია ავსტრიელების მიერ შექმნილი სპეციალური კომპიუტერული პროგრამა "PC CRUSH". პროგრამის მეშვეობით შესაძლებელია ავტოსაგზაო შემთხვევების მოდელირება. პროგრამა იყენებს გამოთვლის რამდენიმე სხვადასხვა მოდელს: მათ შორის საგზაო შემთხვევის იმპულსურ მოდელს, სიხისტეზე დაფუძნებულ დარტყმის მოდელს, კინეტიკურ მოდელს მოძრაობის ტრაექტორიის რეალისტური იმიტაციისთვის და უბრალო კინემატიკურ მოდელს დროისა და დისტანციის შესწავლისთვის. მოდელირების პროგრამით მაქსიმალურად მრავალმხრივი შედეგების მიღების მიზნით შესაძლებელია პროექტის გამოტანა მასშტაბურ და ვერტიკალურ გამოსახულებაში, 3D პერსპექტივაში. პროგრამა ნებისმიერ დაინტერესებულ პირს აძლევს შესაძლებლობას ვიზუალურად მაქსიმალურად დეტალური ინფორმაცია მიიღოს ავტოსაგზაო შემთხვევის, მისი გამომწვევი მიზეზების და პირის ბრალეულობის შესახებ.
ვიდეო გამოსახულების კვლევა
ხშირია შემთხვევები, როდესაც ავტოსაგზაო შემთხვევისას ვიდეო გამოსახულების არსებობის მიუხედავად, რთულია გამოსახულებაზე აღბეჭდილი ავტომობილის ნომრის და მარკის იდენტიფიცირება. კვლევის ჩატარებისთვის ექსპერტიზის ლაბორატორია უზრუნველყოფილია Ocean Systems-ის მიერ შექმნილი ვიდეო გამოსახულებების საექსპერტო კვლევების მოდულებით,რომლის მეშვეობითაც შესაძლებელია სხვადასხვა პირობებში ავტომობილის ნომრის და მარკის გარჩევა და ამოკითხვა.
სატრანსპორტო საშუალებებზე ტექნიკური მახასიათებლების დადგენა:
ხშირია შემთხვევები, როცა ავტომობილის მფლობელებს სხვადასხვა მიზეზით არ მოეპოვებათ დოკუმენტაცია, სადაც აღნიშნულია ავტომობილის ტექნიკური მახასიათებლები. ასეთი დროს დაინტერესებულ პირს აქვს შესაძლებლობა მომართოს ბიუროს სადაც მაღალკვალიფიციური ექსპერტები შეისწავლიან მანქანის ტექნიკურ მახასიათებლებს და დასკვნის საფუძველზე მოახდენენ ავტომანქანის დოკუმენტაციის აღდგენა.
ყველა სახის ავტოსატრანსპორტო საშუალების და სპეცტექნიკის ღირებულების დადგენა:
ყველა დაინტერესებულ პირს, ავტოსატრანსპორტო საშუალების ყიდვის ან გაყიდვის შემთხვევაში, შეუძლია ისარგებლოს ბიუროს მომსახურებით, სადაც ბიუროს ექსპერტები ავტომანქანის ტექნიკური შესწავლის და ბაზრის კვლევის საფუძველზე ადგენენ მანქანის ღირებულებას. მომავალში სპეციალურ პროგრამის მეშვეობით, ასევე იგეგმება ავტომობილის ისტორიის დადგენაც. მაგ: რამდენჯერ იქნა გაყიდული მანქანა, ვინ იყვნენ მფლობელები და ა.შ
ყველა სახის ავტოსატრანსპორტო საშუალების და სპეცტექნიკის დაზიანების შემთხვევაში ზარალის განსაზღვრა და დადგენა:
ავტოავარიის ან სხვა გაუთვალისწინებებლი შემთხვევების დროს ბიუროს ექსპერტების მიერ ხდება დაზიანებული ავტომობილის შესწავლა და რეალური ზარალის დადგენა. ეს სერვისი ეხმარება ავტომფლობელებს ზარალის ანაზღაურების მოთხოვნისას სადაზღვევო კომპანიებთან ურთიერთობაში და ავტოსაგზაო შემთხვევის დროს წარმოქმნილი დავის მარტივად გადაწყვეტაში.
სატრანსპორტო საშუალებებზე საიდენტიფიკაციო კოდის დადგენა
ხშირია შემთხვევები, როცა მეორადი ავტომობილის შეძენისას ფერხდება მანქანის მესაკუთრეზე გადაფორმება, იმის გამო, რომ ავტოსატრანსპორტო საშუალებაზე არ იკითხება ან დაზიანებულია საიდენტიფიკაციო ნომერი ( ე.წ. „ვინ კოდი") ბიუროს ექსპერტები უმოკლეს ვადებში ახორციელებენ საიდენტიფიკაციო კოდის გამოვლენას და ასევე სპეციალური პროგრამის საშუალებით ახდენენ გამოვლენილი საიდენტიფიკაციო კოდის ავტომანქანის რეალურ მონაცემებთან შედარებას.
ზემოთ ჩამოთვლილ სერვისებთან ერთად, ბიურო მომხმარებელს ასევე სთავაზობს ნებისმიერი კატეგორიის სატრანსპორტო საშუალებების და სპეცტექნიკის ტექნიკური მდგომარეობის დადგენას, ტრანსპორტის ტექნიკური გაუმართაობის დადგენას, სატრანსპორტო საშუალებების მიერ მოხმარებული საწვავის ხარჯის დადგენას და სხვა.
ბიუროს მიერ შეთავაზებულ ყველა სერვისზე ექსპერტიზას დაჩქარებული წესით სჭირდება 5 სამუშაო დღე, ხოლო ჩვეულებრივი წესით 30 სამუშაო დღე.
