"ის გადაჭარბებული ხმები, რომელსაც რუსეთთან და პუტინთან დაახლოებული პირები ავრცელებენ, რომ თითქოს საქართველო ნატოში ვერასდროს გაწევრიანდება და ამას თავი უნდა დავანებოთ, ხელმოცარული ადამიანების პოზიციაა. საქართველო აღებულ კურსს არასდროს გადაუხვევს და საბედნიეროდ ჩვენს საპარლამენტო და არასაპარლამენტო პოზიციაში არიან პოლიტიკოსები, რომლებიც ჩვენს პოზიციას იზიარებენ", - აღნიშნა ბარამიძემ.

მისი თქმით, დღევანდელ მთავრობის სხდომაზე მისი სტრუქტურის მიერ გაწეული საქმიანობის შესახებ პრეზენტაცია გამართა.

"2009 წელი ჩვენი ქვეყნისთვის ორი მიმართულებით საკმაოდ მნიშვნელოვანი წელი იყო. პირველი - 2009 წელში საქართველომ პირველად დაიწყო იმ რეფორმების განხორციელება, რომელიც ალიანსში გაწევრიანებას ხელს შეუწყობს; ასევე ევროკავშირთან სავიზო რეჟიმის გამარტივების შესახებ ხელშეკრულების შემუშავება მოხდა, რომელიც წელს უნდა ამოქმედდეს; გარდა ამისა, ასოცირების შესახებ და თავისუფალი ვაჭრობის შესახებ ხელშეკრულებების მოსამზადებელი სამუშაო დაიწო, რომელიც ევროკავშირის ქვეყნებთან საქართველოს ურთიერთობას ახალ ეტაპზე გადაიყვანს და საინვესტიციო გარემოს გააუმჯობესებს", - განაცხადა ბარამიძემ.

ვიცე-პრემიერის შეფასებით, გასულ წელს ერთ-ერთი მნიშვნელოვანი მოვლენა ქართული ჯარის ავღანეთში გაგზავნა იყო, რაც ნატოში ქვეყნის გაწევრიანებისთვის კიდევ ერთი წინ გადადგმული ნაბიჯია. ბარამიძემ აღნიშნა, რომ ქვეყანაში დაწყებული ყველა დემოკრატიული პროცესი მიმდინარე წელსაც გაგრძელდება.