ე.წ. „ხორბლის ოპეკის" შექმნის იდეას, პოლიტიკურს უწოდებს საქართველოს ხორბლისა და პურ-პროდუქტების მწარმოებელთა ასოციაციის თავმჯდომარე ლევან სილაგავა. სილაგავას განმარტებით, აღნიშნული პროექტის განხორციელება მხოლოდ რუსეთის ინტერესშია და მის განხორციელებას არც უკრაინა და არც ყაზახეთი არ დათანხმდება, რადგანაც მათთვის პროექტი ეკონომიკურად მომგებიანი არ არის. სილაგავა აცხადებს, რომ რუსეთის ინტერესშია, მაქსიმალურად ისარგებლოს უკრაინის შავი ზღვის პორტებით, რომელიც უკრაინას თავისი ხორბლით და სიმინდით ისედაც დატვირთული აქვს.
„ფასების კონიუქტურიდან გამომდინარე რუსეთზე იქნება დამოკიდებული დართოს თუ არა ყაზახებს ხორბალი გაიტანონ პორტებიდან , რადგან მათ შავ ზღვაზე გასასვლელი არ აქვთ და ძირითადად აზიურ ბაზრებზე ოპერირებენ, თუ რუსული ხორბლის შემდეგ გაიტანს. ასევე მოიქცევა უკრაინა. იმავდროულად, რუსეთს ყველაზე დიდი სავაგონო პარკი აქვს. უკრაინას და ყაზახეთს კი ვაგონები აკლია, აქედან გამომდინარე როგორც გადაზიდვის ფასებს ისე გაყიდვის ფასების მოკარნახე რუსეთი გამოდის. ამიტომ უკრაინა და ყაზახეთი ჯერ მხოლოდ მონიტორინგს თანხმდება და ყალიბდება როგორც საინფორმაციო საკონსულტაციო ორგანო"- აცხადებს საქართველოს ხორბლისა და პურ-პროდუქტების მწარმოებელთა ასოციაციის თავმჯდომარე.
შეგახსენებთ, რომ უცხოური მედია წერს, რომ ე.წ. „ხორბლის ოპეკის" შექმნით, რუსეთს, უკრაინას და ყაზახეთს შესაძლებლობა ეძლევათ, მსოფლიო ბაზარზე ხორბლის ფასები განსაზღვრონ და ექსპორტიდან უფრო მეტი შემოსავალი მიიღონ.
„ხორბლის პულის შექმნით უკრაინა, რუსეთი და ყაზახეთი 5-8 წლის განმავლობაში ხორბლის უმსხვილესი ექსპორტიორი გახდება და შესაძლებლობა ექნება აშშ-ს კონკურენცია გაუწიოს. საექსპორტო პოლიტიკის თანამშრომლობის ფარგლებში ქვეყნები ბაზარზე საკუთარი პოზიციების უფრო გამყარებას, საფასო კონკურენციის შემცირებას და საექსპორტო ხორბლის ფასის სტაბილიზებას მიაღწევენ. საერთოდ სამ ქვეყანას შესაძლებლობა ექნება საექსპორტო ტარიფების რეგულირებით, საერთო საექსპორტო პოლიტიკაზე გავლენა მოახდინონ",- აღნიშნა კოპენჰაგენის უნივერსიტეტის ანალიტიკოსმა მოგანეს ლუნდმა.