ფინანსთა სამინისტროს ცნობით, შეხვედრაზე ფინანსთა სამინისტრომ ბანკების წარმომადგენლებს გააცნო რამდენიმე ინიციატიცა, რომელთა განხორციელების პროცესში მნიშვნელოვანია საბანკო სექტორის მხარდაჭერა. მათგან, განსაკუთრებით აქტუალურია ორი რეფორმა, რომელიც დაუბეგრავი მინიმუმის უკან დაბრუნების პროცედურებსა და საგადასახადო შემოსავლების აღრიცხვის ახალი მექანიზმის - ერთიანი სახაზინო კოდის შემოღებას ეხება.
„ძალიან მნიშვნელოვანია ერთიან სახაზინო კოდზე გადასვლა. ეს გაამარტივებს და გააიაფებს ანგარიშსწორებას სახელმწიფო ბიუჯეტთან. გადამხდელს აღარ ექნება უამრავ ანგარიშზე ჩასარიცხი თანხა - სახელმწიფო ბიუჯეტში თანხების გადახდა მოხდება ერთი გადარიცხვით, რითაც შეცდომისგან დაზღვეული იქნება როგორც საწარმოს ხელმძღვანელი, ისე ბუღალტერი. მნიშვნელოვანია ისიც, რომ ინფორმაციაზე წვდომა იქნება გაცილებით მარტივი. რაც შეეხება დაუბეგრავ მინიმუმს - ეს პროექტი უპრეცედენტოა საქართველოსთვის. ჩვენ დაუბეგრავი მინიმუმის ცნება შემოვიღეთ მიმდინარე წელს და მომავალი წლის მეორე კვარტალში პირველად დავიწყებთ დაუბეგრავი მინიმუმის დაბრუნებას მათთვის, ვისი ხელფასიც თვეში 500 ლარზე ნაკლებია. ამ რეფორმების პროცესში გვაქვს ბანკების მხარდაჭერის იმედი. ყველა კომერციული ბანკი, ბანკების ასოციაცია, ასევე ეროვნული ბანკი, გვეხმარება, რათა მუდმივი კომუნიკაცია გვქონდეს. ვფიქრობ, ერთობლივად ჩვენ შევძლებთ ოპტიმალურად ჩამოვაყალიბოთ რეფორმები, რომელსაც ვახორციელებთ. ეს ეხება როგორც დაუბეგრავი მინიმუმის უკან დაბრუნებას, ისე ერთიანი სახაზინო კოდის შემოღებას," - განაცხადა ფინანსთა მინისტრმა, ნოდარ ხადურმა.
„მნიშვნელოვანია, რომ ფინანსთა სამინისტროსგან მოდის ასეთი ინიციატივა, რომელიც ხელს შეუწყობს გადამხდელებს. კარგია, რომ სახაზინო კოდების სიმრავლე მცირდება და შესაბამისად, გადამხდელებს შესაძლებლობა ექნებათ ნაკლები ხარვეზებით მოხდეს ბიუჯეტთან ანგარიშსწორება. რაც შეეხება დაუბეგრავ მინიმუმს - ეს მნიშვნელოვანი დახმარებაა იმ ფენისათვის, ვისაც მწირი შემოსავალი აქვს," - განაცხადა „ბაზის ბანკის" გენერალურმა დირექტორმა, დავით ცაავამ.
„ორივე ინიციატიცა მასშტაბურია და საბანკო სექტორი, ბუნებრივია, ასეთ სახელმწიფო პროექტებში აქტიურად ჩაერთვება, ვინაიდან საბანკო სექტორის მხარდაჭერის გარეშე მათი განხორციელება წარმოუდგენელია. საბანკო სექტორისათვის ყველა შეკითხვა მოხსნილია და ეს მოხდა ფინანსთა სამინისტროსთან აქტიური კოორდინაციით და ის მემორანდუმი, რომელიც მომავალში გაფორმდება, მუშაობისთვის ხელსაყრელი იქნება," - ბანკების ასოციაციის პრეზიდენტმა, ზურაბ გვასალიამ.
შეხვედრაზე ეროვნული ბანკის ვიცე-პრეზიდენტმა არჩილ მესტვირიშვილმა კომერციული ბანკების ხელმძღვანელებს გააცნო ფინანსთა სამინისტროსა და ეროვნული ბანკის მიერ მომზადებული პროექტი, რომელიც გრძელვადიანი სახაზინო ვალდებულებების თემას ეხება და ფასიანი ქაღალდების ბაზრის განვითარების ხელშეწყობას ისახავს მიზნად.
შეხვედრის მონაწილეები შეთანხმდნენ, რომ ყველა ამ მიმართულებით ფინანსთა სამინისტროსა და საბანკო სექტორს შორის უფრო აქტიური კომუნიკაცია შედგება, რათა რეფორმების ამოქმედებას ორივე მხარე მომზადებული შეხვდეს და მომავალში გადამხდელებს არ შეექმნათ სირთულეები, როგორც ტექნიკური ისე ინფორმაციული კუთხით.