პარლამენტის ადამიანის უფლებების დაცვისა და სამოქალაქო ინტეგრაციის კომიტეტის თავმჯდომარის მოადგილე გედევან ფოფხაძე "გაზეთ" პრემიერთან" იპოთეკით დაზარალებულ მოსახლეობასთან დაკავშირებით კიდევ ერთ განცხადებას აკეთებს და აღნიშნავს, რომ კანონპროექტი თავისთავად ამ ადამიანების ბედს არსებითად დადებითად არ წყვეტს.
"კანონპროექტი ითვალისწინებს ექვსთვიან მორატორიუმს, რომელსაც ვადა, ადრე თუ გვიან, ამოეწურება და პრობლემა კვლავ პრობლემად დარჩება. ამ დროში ურთიერთობები უნდა დალაგებულიყო ბანკებსა და იპოთეკით დაზარალებულებს შორის და ეს იქნებოდა პირველი ნაბიჯი სიტუაციის გამოსასწორებლად. ამ სფეროში არათანაბარი მდგომარეობა თუ ისევ შენარჩუნდა, მაშინ გაიზრდება იმ ადამიანთა რიცხვი, რომლებიც მსგავსი პრობლემის წინაშე აღმოჩნდებიან. ამ დროს გაჭირვებული ადამიანი სამომავლო პერსპექტივაზე არ ფიქრობს, ზრუნავს იმაზე, დღეს როგორ გადარჩეს, იღებს სესხს, იპოთეკით ტვირთავს სახლს და მოქმედი კანონმდებლობის პირობებში ადამიანთა უმრავლესობა, რომელიც ამ ნაბიჯს დგამს, განწირულია იმისთვის, რომ ბინა დაკარგოს. ამიტომ ამგვარი ურთიერთობები უნდა მოისპოს. ვიღაცაზე უნდა ვიზრუნოთ იმ კუთხით, რომ სახლი შევუნარჩუნოთ, ზოგს კი სოციალური საცხოვრისი უნდა შევთავაზოთ. ყველა შემთხვევაში ეს არის სახელმწიფოს ვალდებულება და იმედი მაქვს, რომ 2014 წლის ბიუჯეტში ამ საკითხის მოსაგვარებლად თანხები გამოიყოფა", - აცხადებს ფოფხაძე და აღნიშნავს, რომ ეს ის საფრთხეა, რომელიც უნდა გამოვასწოროთ.
"პოლიტიკა თუ ისე არ წავა, რომ ორიენტირებული არ იქნება გაჭირვებული მოსახლეობის დახმარებაზე, მაშინ საბოლოო შედეგამდე ვერ მივალთ. უნდა ვიაროთ მადლითა და ერთობით, არ მჭირდება სახელმწიფო, რომელიც გაჭირვებულს გზაში მიატოვებს", - აცხადებს გაზეთ "პრემიერთან" გედევან ფოფხაძე.
