30 სექტემბერს, 11:00 საათზე, სასტუმრო „შერატონ მეტეხი პალასში" „საქართველოს თანაინვესტრების ფონდის" ოფიციალური პრეზენტაცია გაიმართება. პრეზენტაციაზე ფონდის საქმიანობის შესახებ თავად ფონდის აღმასრულებელი დირექტორი გიორგი ბაჩიაშვილი და მმართველი დირექტორები: გიორგი კიკვაძე, ირაკლი მენაბდე და ცოტნე ებრალიძე ისაუბრებენ. პრეზენტაციაზე ასევე სიტყვით წარსდგებიან საქართველოს პრემიერ-მინისტრი ბიძინა ივანიშვილი, საქართველოს ეროვნული საინვესტიციო სააგენტოს დირექტორი გიორგი პერტაია და საქართველოს ბიზნეს ასოციაციის სამეთვალყურეო საბჭოს თავმჯდომარე და პრეზიდენტი გიორგი ჭირაქაძე. პრეზენტაციაზე მიწვეულნი არიან ასევე საქართველოს მთავრობის წევრები, საქართველოში აკრედიტებული დიპლომატიური კორპუსის, საერთაშორისო ორგანიზაციებისა და ფინანსური ინსტიტუტების წარმომადგენლები. ასევე, მსხვილი კომპანიების ხელმძღვანელები, ქვეყანაში მოქმედი და პოტენციური ინვესტორები, ეკონომიკის დარგის ექსპერტები და მედიის წარმომადგენლები.
ფონდი საქართველოს პრემიერ-მინისტრის, ბიძინა ივანიშვილის ინიციატივითა და ქართველ და უცხოელ ინვესტორთა ჯგუფის ძლიერი მხარდაჭერით შეიქმნა. კერძო საინვესტიციო ფონდი პოტენციურ ინვესტორებს ხელსაყრელ პირობებსა და განსაკუთრებულ შესაძლებლობას სთავაზობს საქართველოში პირდაპირი ინვესტიციების განსახორციელებლად. დღეისთვის ფონდში მობილიზებული კაპიტალის მოცულობა 6 მილიარდ აშშ დოლარს შეადგენს.
საქართველოს თანაინვესტირების ფონდი კერძოა და მისი ინვესტორების სია მოიცავს: დაბი ჯგუფს (Dhabi Group), რაკიას (RAK Investment Authority), აზერბაიჯანის რესპუბლიკის ნავთობის სახელმწიფო ფონდს (State Oil Fund of the Republic of Azerbaijan), კომპანია ყაზტრანსოილის წარმომადგენელ კომპანიას - ბათუმის ინდუსტრიულ ჰოლდინგს (Batumi Industrial Holding Limited), ჩალიკ ჰოლდინგს (Calik Holding A.S), მაილსთოუნ ინთერნეშენალ
ჰოლდინგს (Milestone International Holdings Group Limited), ბიძინა ივანიშვილს,ალექსანდრე მაშკევიჩს, ბადრი პატარკაციშვილის ოჯახს და სხვა ინვესტორებს.