"იქნებ ვინმე ღვთისნიერმა გადასცეთ ქვეყნის პრემიერ-მინისტრს, რომ ტყუილებზე დაყრდნობით არ შეიძლება გამუდმებით ქვეყნის მართვა", აღნიშნულის შესახებ განცხადებას „აგრარული უნივესიტეტის" მთავარი იურისტი ლილი ბეგიაშვილი აკეთებს, რომელიც განმარტავს, რომ პრემიერმა აგრარულ უნივერსიტეტთან მიმართებაში არაინფორმირებული განცხადება ადრეც გააკეთა და ამჯერად იგივე, 25 სექტემბერს, ექსპერტებთან შეხვედრისას გაიმეორა.
„ძალიან ვწუხვარ, რომ მიუხედავად ჩემი თხოვნისა, არავინ გადასცა ქვეყნის პრემიერ-მინისტრს ეს მოკრძალებული ინფორმაცია და პრემიერი კვლავ არ ფლობს ინფორმაციას აგრარული უნივერსიტეტის შესახებ!
19 სექტემბერს უკვე განმეორებით გააკეთა პრემიერმა იგივე არაინფორმირებული განცხადება აგრარულის 1 ლარად ყიდვასთან დაკავშირებით, ახლა უკვე ექსპერტებთან შეხვედრაზე!
ყველაზე სამწუხარო ისაა, რომ ე.წ. ექსპერტებიდან არავინ იცის, სინამდვილეში რამდენ ლარზეა საუბარი! ნუ, ეს იმიტომ, რომ ძალიან კვალიფიციური ექსპერტი გვყავს !
იქნებ ვინმე ღვთისნიერმა გადასცეთ ქვეყნის პრემიერ-მინისტრს, რომ ტყუილებზე დაყრდნობით არ შეიძლება გამუდმებით ქვეყნის მართვა!
ასევე, გადასცეთ, რომ ვიდრე ოფიციალურად გადადგება თანამდებობიდან, ასეთი მასშტაბის პრეს-კონფერენციებზე იქნებ გადამოწმებულ ინფორმაციას დაეყრდნოს ხოლმე!
ასევე, გადასცეთ, რომ ყველა პრეს-კონფერენციაზე ერთიდაიმავე ტყუილის გამეორება "აგრარული უნივერსიტეტის 1 ლარად ყიდვასთან" დაკავშირებით სხვა რომ არაფერი - უხერხულია და აშკარად კახა ბენდუქიძის პოლიტიკურ დევნად უნდა შეფასდეს!
ასევე, გადაეცით, რომ არსებობს მთელი რიგი სამართლებრივი დოკუმენტებისა, რომლებიც საჯაროა, ყველასათვის ხელმისაწვდომია და ქვეყნის პრემიერ-მინისტრს შეეძლო თუნდაც წინდახედულობის მინიმალური ნორმიდან გამომდინარე, ერთხელ მაინც თვალი შეევლო:
1. საქართველოს ეკონომიკისა და მდგრადი განვითარების სამინისტროსა და საქართველოს აგრარულ უნივერსიტეტს შორის 2012 წლის 24 თებერვალს დადებული ნასყიდობის ხელშეკრულება;
2. საქართველოს პრეზიდენტის 2012 წლის 15 თებერვლის განკარგულება;
3. საქართველოს პრეზიდენტის 2012 წლის 12 ოქტომბრის განკარგულება.
გადაეცით, გაეცნოს ამ აქტებს და მაშინ თვალნათლივ დაინახავს, რომ კახა ბენდუქიძე არის განათლების სფეროში განსაკუთრებული მნიშვნელობის ინვესტიციის განმახორციელებელი!
სწორედ ზემოთდასახელებული აქტების საფუძველზე, კახა ბენდუქიძეს აკისრია 4 150 000 აშშ დოლარის ოდენობით საპრივატიზებო თანხის გადახდა სახელმწიფო ბიუჯეტში, ხოლო 1 000 000 აშშ დოლარი უკვე გადაურიცხა საჯარო სკოლებს.
გარდა ამისა, მას დაეკისრა 8 000 000 ლარის ინვესტირება საქართველოს აგრარულ უნივერსიტეტში, მისი ინფრასტრუქტურის გაუმჯობესებასა და განვითარების მიზნით. ნაცვლად ამ 8 000 000 ლარისა ამ დროისათვის კახა ბენდუქიძემ უკვე განახორციელა 12 000 000 ლარზე მეტის ინვესტირება აგრარულ უნივერსიტეტში და კვლავ განაგრძობს ასეთ ინვესტირებას.
სად არის აქ „1 ლარი" ? სად დაინახეთ აქ „1 ლარად შეძენილი ქონება"?
ფართოდ გაახილეთ თვალები - „ეცადეთ, დაინახოთ მეტი!"- აცხადებს ლილი ბეგიაშვილი.