ფინანსთა სამინისტრო, 2014 წლის ქვეყნის მთავარ საფინანსო დოკუმენტს პარლამენტს 1-ელ ოქტომბრამდე წარუდგენს. როგორც „საბიუჯეტო კოდექსშია" გაწერილი საქართველოს მთავრობა ვალდებულია საკანონმდებლო ორგანოს სახელმწიფო ბიუჯეტის პროექტი და ქვეყნის ძირითადი მონაცემებისა და მიმართულებების დოკუმენტი არა უგვიანეს 1 ოქტომბრისა წარუდგინოს. მთავრობა მიმდინარე კვირაში 2014 წლის ბიუჯეტის პროექტს დაამტკიცებს და ამის შემდეგ, სავარაუდოდ 30 სექტემბერს ბიუჯეტს პარლამენტში შეიტანს. ბიუჯეტის საკანონმდებლო ორგანოში წარდგენის შემდეგ კანონმდებლები მის განხილვას დაიწყებენ. საკომიტეტო განხილვებისას გამოთქმულ შენიშვნებსა და წინადადებებს, ასევე სახელმწიფო აუდიტის სამსახურისა და საქართველოს ეროვნული ბანკის დასკვნებს პარლამენტი არა უგვიანეს 22 ოქტომბრისა უგზავნის საქართველოს მთავრობას. მთავრობა ვალდებულია პარლამენტს ბიუჯეტის გადამუშავებული ვარიანტი 5 ნოემბრამდე გადაუგზავნოს.
სახელმწიფო ბიუჯეტის პროექტი განიხილება პლენარულ სხდომაზე. პლენარულ სხდომაზე წლიური საბიუჯეტო კანონის პროექტსა და მიმდინარე წლის სახელმწიფო ბიუჯეტის მოკლე მიმოხილვის შესახებ მოხსენებას წარადგენს პრემიერ-მინისტრი ან მთავრობის რომელიმე წევრი პრემიერ-მინისტრის შესაბამისი აქტით მიღებული დავალებით. პარლამენტი ასევე ისმენს სახელმწიფო აუდიტის სამსახურის, ეროვნული ბანკისა და პარლამენტის საფინანსო-საბიუჯეტო კომიტეტის მოხსენებებს. პლენარულ სხდომაზე გამოთქმული შენიშვნები და წინადადებები არა უგვიანეს 15 ნოემბრისა ეგზავნება მთავრობას.
მთავრობა სახელმწიფო ბიუჯეტის პროექტის საბოლოო ვარიანტს და მის შესაბამის ქვეყნის ძირითადი მონაცემებისა და მიმართულებების დოკუმენტის გადამუშავებულ ვარიანტს პლენარულ სხდომაზე გამოთქმული შენიშვნებისა და წინადადებების გათვალისწინების მდგომარეობის შესახებ ინფორმაციასთან ერთად პარლამენტს არა უგვიანეს 30 ნოემბრამდე წარუდგენს. სახელმწიფო ბიუჯეტის პროექტს პარლამენტი კენჭს უყრის არა უგვიანეს დეკემბრის მესამე პარასკევისა. სახელმწიფო ბიუჯეტის კანონის პროექტი მიიღება სიითი შემადგენლობის უმრავლესობით, ერთი მოსმენით.
