ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა "ექსპო ჯორჯიაში" ბიზნესის განვითარების პირველი საერთაშორისო ფორუმი გახსნა.
ფორუმი ორდღიანია და მისი მიზანია საქართველოს ეკონომიკური განვითარებისთვის აუცილებელი საკითხების მიმოხილვა. საქართველოს საინვესტიციო გარემოსა და კაპიტალის მოზიდვის საკითხები, ბიზნესის განვითარებისთვის მნიშვნელოვანი ინსტრუმენტების განხილვა.
მინისტრის განცხადებით, მცირე და საშუალო ბიზნესისთვის რთულად ხელმისაწვდომია თანამედროვე ტექნოლოგიები, ის სერვისები, რომლებიც საკონსულტაციო და ფინანსური სექტორიდან უნდა მოდიოდეს.
"ძალიან საინტერესო პრეზენტაციები ჩატარდა, სადაც იყო წარმოდგენილი ის გზები, თუ როგორ ხდება ქვეყანაში პირდაპირი უცხოური ინვესტიციების მოზიდვა და რა ფაქტორები მოქმედებს. მივესალმებით იმას, რომ მსოფლიოში გამოჩენილი ექსპერტები ჩვენს ქვეყანას გაუზიარებენ გამოცდილებას იმის შესახებ, თუ როგორ უნდა ვითარდებოდეს გარდამავალი ეკონომიკის ქვეყნებში მცირე და საშუალო ბიზნესი. როგორ უნდა ხდებოდეს ცვლილებების მენეჯმენტი, როგორ უნდა გამოიყენონ მათ მსოფლიოში არსებული თანამედროვე ტექნიკური მიღწევები" - განაცხადა კვირიკაშვილმა სიტყვით გამოსვლისას.
ფორუმზე მოხსენებით წარსდგნენ ეროვნული საინვესტიციო სააგენტოს ხელმძღვანელი გიორგი პერტაია, მცირე და საშუალო მეწარმეთა ასოციაციის აღმასრულებელი პრეზიდენტი კახა კოხრეიძე, ასევე ლონდონის ბიზნესისა და ფინანსების სკოლის დოქტორი სტივ პრიდი.
ბიზნესის განვითარების პირველი საერთაშორისო ფორუმის ფარგლებში "ექსპო ჯორჯიას" მესამე პავილიონში გამოფენაც იმართება, რომლიც მიზნად ისახავს ბიზნესის განვითარების იდეების, ფინანსური რესურსებისა და საკონსულტაციო მომსახურების შესახებ ინფორმაციის გაზიარებას.
ბიზნესის განვითარების პირველ საერთაშორისო ფორუმში მონაწილეობას იღებენ ბანკები, საინვესტიციო, დონორი, საერთაშორისო და მიკროსაფინანსო ორგანიზაციებისა და სხვადასხვა ტიპის ბიზნეს საკონსულტაციო კომპანიები. მათ შორის, ლონდონის ბიზნესისა და ფინანსების სკოლა (LSBF), ევროპის რეკონსტრუქციისა და განვითარების ბანკი (EBRD), ა.შ.შ-ს საერთაშორისო განვითარების სააგენტოს ეკონომიკური აღმავლობის ინიციატივა (EPI) და ა.შ.
ორი დღის განმავლობაში კონფერენციის მონაწილეები წარმოადგენენ თავიანთ მომსახურებას - საინტერესო შეთავაზებას. მათ შესაძლებლობა ექნებათ წარმოადგინონ ახალი პროდუქტები, იდეები, დაამყარონ საქმიანი ურთიერთობები სასურველ მომხმარებლებთან, მოამზადონ უნიკალური შეთავაზება დამთვალიერებლებისთვის, ჰქონდეთ შესაძლებლობა პირდაპირი კონტაქტი იქონიონ მიზნობრივ აუდიტორიასთან.
