ღვინის ტურიზმის პოპულარიზაციისა და მისი განვითარების ხელშეწყობის მიზნით, ტურიზმის ეროვნული ადმინისტრაცია ახალ პროექტს ახორციელებს.
პროექტი ორ ეტაპად იყოფა. პირველ ეტაპზე დაგეგმილია სარეკლამო რგოლის მომზადება, რომელშიც ასახული იქნება რთველის, როგორც ღვინის ტურიზმის ერთ-ერთი მნიშვნელოვანი კომპონენტის პროცესი. აღნიშნული ვიდეოს გავრცელება მოხდება სოციალური ქსელების მეშვეობით. ხოლო მეორე ეტაპზე დაგეგმილია ადმინისტრაციის სახელობითი, სასაჩუქრე ღვინოების ჩამოსხმა, რომელიც საჩუქრად გადაეცემათ ადმინისტრაციის სტუმრებს.
ვიდეო რგოლში მონაწილეობას მიიღებენ, როგორც ადმინისტრაციის თანამშრომლები, ასევე „ფეისბუქის" საშუალბით შერჩეული ადამიანები.
სარეკლამო რგოლის გადაღებები კახეთში ხვალ, 21 სექტემბერს დაიწყება.
ვიდეო რგოლის გადაღებამდე ადმინისტრაციის ფეისბუქის გვერდზე გამოქვეყნდა სპეციალური დავალება - „მოიფიქრეთ სლოგანი ღვინის ტურიზმისათვის". სლოგანის შემოთვაზება შეეძლო ნებისმიერ მსურველს. მოწოდებული სლოგანებიდან წინასწარი შერჩევით გამოვლინდა 10 მონაწილის მიერ შემოთავაზებული 100- მდე ვარიანტი, საიდანაც საბოლოოდ 4 აირჩევა. გამარჯვებული სლოგანის ავტორებს საშუალება მიეცემათ მიიღონ მონაწილეობა ვიდეო რგოლში. გამარჯვებული სლოგანები ასევე გამოყენებული იქნება ღვინის ეტიკეტზე (ავტორის მითითებით); სხვადასხვა თემატურ ბროშურებსა და ვებ-გვერდებზე.
