აჭარის მთავრობის თავმჯდომარე ესპანელ ბიზნესმენებს შეხვდა. გაცნობითი ხასიათის შეხვედრაზე არჩილ ხაბაძემ ესპანელ ინვესტორებს აჭარაში განხორციელებული, მიმდინარე და დაგეგმილი პროექტები გააცნო, ასევე წარმოუდგინა საინვესტიციო გარემო და აჭარის ტურისტულ პოტენციალი. დელეგაცია 15 ბიზნესმენისგან შედგებოდა, რომლებიც სამშენებლო, საინჟინრო, თევზჭერის, სოფლის მეურნეობის, ხის ექსპორტის, საბადოების ექსპლუატაციის, ტექსტილის წარმოებისა და სხვა სფეროში მოღვაწეობენ.
„ამ ეტაპზე ესპანეთიდან ბიზნესმენთა ჯგუფი ჩამოვიდა რეგიონის გასაცნობად. ისინი მთელ საქართველოში მოგზაურობენ, ეცნობიან საინვესტიციო გარემოს. ეს ჩვენი პირველი შეხვედრა იყო. მათგან დიდი ინტერესი ჩანს ჩვენი რეგიონის მიმართ და თუკი ეს ინტერესი გაღრმავდება და ჩვენი შეთავაზებებიც ერთმანეთს დაემთხვევა, საინვესტიციო პროექტების განხორციელებას ხელს არაფერი შეუშლის," - აღნიშნა არჩილ ხაბაძემ.
