ბაჩო ახალაიას წინააღმდეგ ე.წ. ციხის ბუნტის პერიოდთან დაკავშირებულ ბრალდებაზე სასამართლო განხილვები დასასრულს უახლოვდება. დღევანდელ სხდომაზე მხარეები დასკვნით სიტყვას წარმოთქვამენ, რის შემდეგაც ბაჩო ახალაიას სავარაუდოდ, საბოლოო სიტყვის თქმის უფლება მიეცემა. ამის შემდეგ მოსამართლემ განაჩენი უნდა გამოიტანოს.
ახალაიასთან ერთად აღნიშნულ საქმეში ბრალდებულები არიან მეგის ქარდავა, დავით ჭაკუა და რევაზ ჭარბაძე. დაცვის მხარე აცხადებს, რომ პროკურატურას არანაირი მტკიცებულებები არ აქვს.
„დასკვნითი სიტყვით წარსდგება დაცვის მხარე, მას შემდეგ რაც ბრალდების მხარე წარმოთქვამს თავის დასკვნით სიტყვას. ეს ეხება ე.წ. ციხის ბუნტის ეპიზოდს და როგორც ყველა საქმეში ამასთან დაკავშირებითაც ვითხოვთ ბაჩო ახალაიას გამართლებას, ვინაიდან არანაირი მტკიცებულება არ არსებობს იქ რაიმე დანაშაულის ჩადენის", - აცხადებს ბაჩო ახალაიას ადვოკატი მალხაზ ველიჯანაშვილი.
