საქართველოს ადვოკატთა ასოციაციის თავმჯდომარე ზაზა ხატიაშვილი შინაგან საქმეთა მინისტრ ირაკლი ღარიბაშვილის, ქვეყნის მთავარი პროკურორის არჩილ კბილაშვილის და მისი მოადგილის ლაშა ნაცვლიშვილის თანამდებობებიდან გადადგომას მოითხოვს.
როგორც ხატიაშვილმა დღეს გამართულ პრესკონფერენციაზე განაცხადა, "მისი მოთხოვნის საფუძველი წყალტუბოს პოლიციის სამმართველოში შინაგან საქმეთა სამინისტროს თანამშრომლების რევაზ ქობულიას და მალხაზ მჟავიას დაწინაურებაა, რომლებიც ადამიანის წამებაში იღებდნენ მონაწილეობას".
"პოლიციის ამ ორ თანამშრომელს ადამიანის წამებაში აქვს მიღებული მონაწილეობა, რაც დადგენილია ევროპის სასამართლოს მიერ და რომლის თაობაზეც ინფორმირებულია მთავარი პროკურორი არჩილ კბილაშვილი. თუმცა ამის მიუხედავად, ეს პირები სისხლის სამართლის პასუხისმგებლობაში მიცემის ნაცვლად დაწინაურდნენ. ამ საქმეს შეიძლება ეწოდოს "გირგვლიანი -2". საქმე ეხება წყალტუბოს პოლიციის სამმართველოში 2005 წელს მომხდარ შემთხვევას, როდესაც მოქალაქე რევაზ დვალიშვილი აწამეს. დვალიშვილი წყალტუბოს სამმართველოს თანამშრომლებმა მათ შორის, რევაზ ქობულიამ და მალხაზ მჟავიამ დააგდეს, ფეხებით შესდგნენ, ფეხით უჭყლიტდნენ ხელის თითებს, შემდეგ ფეხებით დაკიდეს ზემოდან ქვემოთ, დააწყეს ზედ "კოკა-კოლა" და მოსთხოვეს, რომ აელოკა. აღნიშნული ფაქტი შეისწავლა ევროპის სასამართლომ, რომელმაც დვალიშვილის მიმართ არადამინური მოპყრობა დაადგინა და სახელმწიფოს მის სასარგებლოდ 12 00 ევროს გადახდა დააკისრა. 2012 წლის თებერვალში კი, რევაზ დვალიშვილმა მთავარ პროკურორს არჩილ კბილაშვილს მიმართა საჩივრით, წყალტუბოს სამმართველოს თანამშრომლების წინააღმდეგ სისხლის სამართლის დევნის დაწყებაზე. ცნობილი გახდა რომ რევაზ ქობულია დაინიშნა წყალტუბოს პოლიციის სამმართველოს ხელმძღვანელად და ასევე დაწინაურდა მალხაზ მჟავია. როდესაც მიხეილ სააკაშვილი მოვიდა ხელისუფლებაში მისი მმართველობის პირველ წელს არ მომხდარა შემთხვევა როდესაც ადამიანის წამებაში და არაადამიანურ მოპყრობაში მხილებული ადამიანები დაწინაურებულიყვნენ, ამას ადგილი აქვს დღევანდელი ხელისუფლების პირობებში. იმის ნაცვლად, რომ პოლიციის თანამშრომლები დაეკავებინათ და ისინი სისხლის სამართლბრივ პასუხისმგებლობაში მიცემულიყვნენ, დაწინაურდნენ. განხორციელდა იგივე, რაც თავის დროზე მოხდა სანდრო გირგვლიანის საქმესთან დაკავშირებით", - განაცხადა ზაზა ხატიაშვილმა და დასძინა, რომ თუ პრემიერ-მინისტრი მთავარი პროკურორის, შინაგან საქმეთა მინისტრის და მთავარი პროკურორის მოადგილის თანამდებობებიდან გათავისუფლების შესახებ გადაწყვეტილებას არ მიიღებს, იგი ელისუფლების წინააღმდეგ იმავე ნაბიჯებით და მეთოდებით გააგრძელებს ბრძოლას, როგორც თავის დროზე მიხეილ სააკაშვილის ხელისუფლებას ებრძოდა.
