"ახალი მემარჯვენეების" წარმომადგენლის მანანა ნაჭყებიას შეფასებით, ეროვნულ-დემოკრატიული პარტიის განცხადებები "ხელისუფლების მიერ გაჩაღებულ პიარს ემსახურება".
ამის შესახებ ნაჭყებიამ "ჯი-ეიჩ-ენს" ედპ-ის იმ გადაწყვეტილებაზე კომენტირებისას განუცხადა, რომელიც თბილისის მერობის ერთიანი ოპოზიციონერი კანდიდატის გამოსავლენად მიმდინარე კონსულტაციებში მონაწილეობაზე უარის თქმას შეეხება და იმ განცხადებაზე, რომლითაც პარტიის ლიდერმა ბაჩუკი ქარდავამ "ნოღაიდელის გარშემო თავმოყრილი ძალები" ქვეყნის ეროვნული ინტერესების ღალატში დაადანაშაულა და განმარტა, რომ არჩევნების საფარქვეშ რუსული სცენარით საქართველოს ხელისუფლების რევოლუციური გზით შეცვლა მზადდება.
"ქარდავას პარტიის ეს განცხადებები სახელისუფლებებო განცხადებებია და სწორედ ხელისუფლების მიერ გაჩაღებულ პიარს ემსახურება", - განუცხადა ნაჭყებიამ "ჯი-ეიჩ-ენს".
რაც შეეხება აღნიშნულ კონსულტაციებთან დაკავშირებით "ეროვნული ფორუმის" ბოიკოტირებას, ნაჭყებია კახა შარტავას პარტიის გადაწყვეტილებას მიესალმება და იმ მიზეზსაც, რაც ფორუმის ლიდერმა ბოიკოტირების მიზეზად დაასახელა, არგუმენტირებულს უწოდებს.
"ვფიქრობ, ფორუმის განცხადებაში მართლაც არის მინიშნებული ძალიან სერიოზული მიზეზი, რის გამოც კახა შარტავას გუნდი ამ კონსულტაციებში არ ჩაერთვება. ვეთანხმები "ეროვნულ ფორუმს" იმ შეფასებაშიც, რომ ერთობის სახელით უკვე რეალურად არსებული ერთობის დაშლა ხდება", - განაცხადა ნაჭყებიამ.
რაც შეეხება ნოღაიდელის პარტიასთან მიმართებაში ფორუმის შეფასებას, "ახლების" წარმომადგენლის თქმით, მათი მოსაზრებები ამ ნაწილშიც იდენტურია.
"ნამდვილად არ მინდა დავიჯერო, რომ ის ადამიანები, ვინც გუშინ ჭადრაკის სასახლეში იმყოფებოდნენ, ტაშს უკრავდნენ ნოღაიდელს. მინდა მჯეროდეს, რომ ისინი იქ, ტაშს უკრავდნენ ერთობის მოთხოვნას, რომლის მზადყოფნაც ჩვენც არაერთხელ გამოგვითქვამს, მაგრამ არა ამ ფორმით და არა საზოგადოების დაშანტაჟების გზით", - განმარტა ნაჭყებიამ.
შეგახსენებთ, რომ "ეროვნული ფორუმი" არა მხოლოდ თბილისის მერობის ერთიანი კანდიდატის გამოსავლენად მიმდინარე კონსულტაციებში არ ჩაერთვება, არამედ ადგილობრივი თვითმმართველობის არჩევნებში საერთოდ არ მიიღებს მონაწილეობას. ამის შესახებ პარტიის ლიდერმა კახა შარტავამ საგანგებო განცხადება დღეს გააკეთა.
