წითელ ხიდთან ნაღმზე აფეთქებული 25 წლის ახალგაზრდის ჯანმრთელობის მდგომარეობა კვლავ მძიმეა. როგორც "ჯი-ეიჩ-ენს" რუსთავის ცენტრალური საავადმყოფოს დირექტორმა პაპუნა ბახტაძემ განუცხადა, პაციენტი ამ დრომდე რეანიმაციულ განყოფილებაში, მართვით სუნთქვაზე რჩება.
მისი თქმით, ჯერჯერობით ინფექციური გართულებების საშიშროება ნაკლებადაა, თუმცა აღენიშნება ტემპერატურის მატება.
"რა თქმა უნდა ძალიან მძიმე მდგომარეობაა, მაგრამ სტაბილურადაა. უმძიმესი ავადმყოფია. აფეთქებამ კიდური დაუზიანა და მეორე ფეხზე კუნთები. სხეულის დიდი ნაწილი უცხო სხეულებით არის დაზიანებული. ეს გარდა იმისა, რომ შოკია და ტრავმაა, ასევე არის ინფექციის საშიშროება", - განაცხადა ბახტაძემ.
მისი თქმით, პაციენტი საყოველთაო დაზღვევის პროგრამით მკურნალობს და მის ოჯახს არაფრის გადახდა არ უწევს.
25 წლის სერხან მუსაევი რუსთავის ცენტრალურ საავადმყოფოში 31 მარტს, საღამოს 20:00 საათზე მოათავსეს. ის მარნეულის რაიონის სოფელ კირაჩმუღალოსთან ნაღმის აფეთქების შედეგად დაშავდა.
სერხან მუსაევი სოფელ კირაჩმუღალოში მეგობართან იმყოფებოდა. ის წითელი ხიდის საზღვრის მიმდებარე ტერიტორიაზე დაკარგული ძროხის მოსაძებნად წავიდა და ნაღმზე აფეთქდა.
პაციენტს სერიოზული პოლიტრავმა და ტრავმულ-ჰემორატიული შოკი აღენიშნება. აფეთქებამ მოაგლიჯა მარცხენა ტერფის და წვივის ნაწილი, მარჯვენა ფეხზე კუნთების დეფექტი და გარე ჭრილობები აქვს.
