დევნილთა სამინისტრო კრწანისის გამგებლის განცხადებას გამოეხმაურა. სამინისტროს პრესასთან და საზოგადოებასთან ურთიერთობის სამმართველოს ხელმძღვანელი ეკა გულუა აცხადებს, რომ დევნილი ოჯახის გამოსახლებისთვის საჭიროა სამინისტროს ნებართვა და თუ მსგავსი ნებართვა არ არსებობს, მას ვერავინ გამოასახლებს.
აღნიშნული განცხადებით ეკა გულუა კრწანისის გამგებლის დევნილ გულბანების ოჯახში ვიზიტს გამოეხმაურა. გამგებელი აფხაზეთიდან დევნილ გულბანების ოჯახს ესტუმრა და აღნიშნა, რომ აღნიშნული ოჯახი უახლოეს დღეებში უნდა გამოასახლონ, რომ გამგეობამ დევნილთა სამინისტროს თხოვნით მიმართა ადგილზე გაცნობოდნენ ამ დევნილი ოჯახის მდგომარეობას, თუმცა, სამინისტრო არ დაინტერესდა. ეკა გულუა კი აცხადებს, რომ გამგებელმა აღნიშნული ოჯახის პრობლემის შესახებ დღეს პირველად გაიგო, სამინისტრო კი აქტიურად მუშაობს პრობლემის მოგვარებაში.
„ქალბატონმა ხათუნამ აღნიშნული პრობლემის შესახებ დღეს გაიგო. სამინისტრო კი აქტიურად იყო ჩართული მის მოგვარებაში. მოლაპარაკება გვქონდა აღსრულების ბიუროსთანაც და დევნილ ქალბატონს ბინის ქირაც შევთავაზეთ და იურიდიული დახმარებაც. დევნილი ოჯახის გამოსახლებისთვის საჭიროა სამინისტროს თანხმობა და ამ ოჯახის გამოსახლება ვერ მოხდება სამინისტროს თანხმობის გარეშე."
ეკა გულუამ ასევე აღნიშნა, რომ სამინისტროს გააჩნია ამბიციური გეგმა, რომელიც ითვალისწინებს დევნილი მოსახლეობის ძირითადი საჭიროებების მოგვარებას 4 წლის მანძილზე. აღნიშნული გეგმის შესრულება დაწყებულია დევნილთა გრძელვადიანი განსახლების კრიტერიუმების შესაბამისად, რომელიც სამინისტრომ დონორ, პარტნიორ და არასამთავრობო ორგანიზაციებთან ერთად შეიმუშა. გულუა ასევე აცხადებს, რომ აღნიშნული კრიტერიუმების შესაბამისად, საცხოვრებელი ბინების განაწილება ერთ თვეში იმერეთში დაიწყება.
