შემოსავლების სამსახურის ინფორმაციით, 6-11 თებერვლის ჩათვლით, საბაჟოგ ამშვებიპ უნქტების „სარფისა" და „ვალეს" გავლით, საქართველოში სხვადასხვა იმპორტიორების მიერ, 300 ტონამდე კარტოფილი შემოვიდა.
შემოსავლების სამსახურის საბაჟო დეპარტამენტი სრულად ახორციელებს ფიტოსანიტარულ და სასაზღვრო ვეტერინარულ კონტროლს. შესაბამისად, საბაჟო დეპარტამენტის, ფიტოსანიტარი სპეციალისტების მიერ, ფიტოსანიტარული სასაზღვრო კონტროლის პროცედურების განხორციელებისას, საეჭვო ობიექტის იდენტიფიკაციისა და დადასტურების მიზნით, სატრანსპორტო საშუალებებიდან აღებული კარტოფილის ნიმუშები სპეციალურ ლაბორატორიაში გადაიგზავნა. ლაბორატორიული კვლევების მიხედვით, 300 ტონამდე კარტოფილი საკარანტინო მავნებლით - Synchytrium endobioticum (Schilb) Perc - კარტოფილის კიბოთი, ასევე საკარანტინო მიკრო ორგანიზმით - Ralstonia solanacearum -ით (მურასიდამპლე) არის დაავადებული. აღნიშნული დაავადება საკარანტინოა. საქართველოს მთავრობის N429 დადგენილების თანახმად, ასეთი საქონელი ექვემდებარება განადგურებას ან უკან, (ექსპორტიორქვეყანაში) გაბრუნებას.
„ინფორმაცია მუდმივად და ოპერატიულად მიეწოდება საქართველოს სურსათის ეროვნულ სააგენტოს, რომელიც ვალდებულია თავის მხრივ ნოტიფიკაცია გადაუგზავნოს თურქეთის მხარეს.
ჩვენ გამოვთქვამთ მზადყოფნას აქტიურად ვითანამშრომლოთ თურქეთის შესაბამის უწყებებთან საქონლის თანმდევი დოკუმენტების ნამდვილობის დადგენასთან დაკავშირებულ საკითხებში"- აცხადებენ შემოსავლების სამსახურში.
უწყებაში განმარტავენ, რომ საქართველოს მხრიდან არ მომხდარა იმპორტის მოთხოვნებთან დაკავშირებული საკანონმდებლო და ნორმატიული ცვლილება. გამოვლენილი ფაქტები ადმინისტრირების და მოქმედი კანონმდებლობის აღსრულების შედეგია.
2012 წლის განმავლობაში საქართველოში თურქეთიდან 23 ათას ტონაზე მეტი კარტოფილი შემოვიდა. აქედან, ფიტოსანიტარული კონტროლის განხორციელებისას არც ერთმა აღებულმა ნიმუშმა არ აჩვენა დადებითი შედეგი.
„შემოსავლების სამსახური, სრული დატვირთვით ახორციელებს პრევენციულ ღონისძიებებს: საბაჟო დეპარტამენტის სანიტარული, ფიტოსანიტარული და არასატარიფო ღონისძიებების სამმართველოს მიერ კონტროლდება ცხოველური და მცენარეული წარმოშობის ყველა იმპორტირებული ნაწარმი. ევროკავშირის რეკომენდაციების გათვალისწინებით დამტკიცებული რისკების პროგრამით, მონიტორინგს ექვემდებარება მაღალი რისკის მქონე მცენარეული და ცხოველური წარმოშობის სასურსათო პროდუქტი. კვლევები ხორციელდება სპეციალურ ლაბორატორიებში. შესაბამისად, საზოგადოებრივი და ცხოველთა ჯანმრთელობისათვის მავნე პროდუქცია და მცენარეთა დაავადების გამომწვევი მავნებლები საბაჟოს გავლით საქართველოში ვერ მოხვდება.
გვინდა გავაფრთხილოთ იმპორტიორი კომპანიები, არ დაუშვან და დაავდებული პროდუქტების შეძენა და იმპორტირება საქართველოში. წესრიგში იქონიონ ექსპორტიორი და სატრანზიტო ქვეყნების, აგრეთვე საქართველოს კანონმდებლობით გათვალისწინებული ტვირთის თანხმლები დოკუმენტები, რომლებიც ადასტურებს პროდუქტების წარმოშობას, ხარისხს, მის შესაბამისობას სტანდარტებთან და უვნებლობას. საქონლის იმპორტთან დაკავშირებული, კანონმდებლობით განსაზღვრული მოთხოვნების დარღვევისას. პროდუქტი დაექვემდებარება განადგურებას ან გაბრუნდება ექსპორტიორ ქვეყანაში"- აცხადებენ შემოსავლების სამსახურში.
შემოსავლების სამსახურმა აამოქმედა ყველა საჭირო მექანიზმი იმისათვის, რომ დაავადებული კვების პროდუქტი საბაჟოს გავლით ვერ მოხვდეს საქართველოში.
