"მადამ ფიგარომ" 2012 წლის ქალები დაასახელა. გამოკითხვის მიხედვით, პირველ ადგილზე რუსული პანკ-ჯგუფის Pussy Riot-ის წევრი, ნადეჟდა ტოლოკონიკოვა გავიდა. როგორც ცნობილია, ამ ფემინისტური ჯგუფის სამი მონაწილე, ეკლესიაში ანტიპუტინური გამოსვლის გამო, დააპატიმრეს და ორი წლით თავისუფლების აღკვეთა მიუსაჯეს. 23 წლის ნადეჟდა ფილოსოფიის ფაკულტეტის სტუდენტი და 4 წლის გოგონას დედაა. მან შეძლო, რომ რუსეთში თავისუფალი სიტყვის დევნის პრობლემებისათვის, საერთაშორისო საზოგადოების ყურადღება მიექცია.
მეორე ადგილზე აშშ-ის პირველი ლედი, მიშელ ობამა გავიდა. მიშელი, თითქმის ყველა სოციოლოგიური გამოკითხვებით, აშშ-ის ერთ-ერთი ყველაზე პოპულარული პირველი ლედია. 6 ნოემბერს ბარაკი და მიშელი კვლავ გახდნენ თეთრი სახლის მასპინძლები.
მესამე ადგილი მერილ სტიპმა მოიპოვა. როდესაც მერილი სცენაზე ოსკარის ასაღებად ავიდა, საუკეთესოდ შესრულებული როლისათვის ფილმში "რკინის ლედი", ამერიკელების უმრავლესობას აღმოხდა: კვლავ ის! - წერს გამოცემა. ეს უკვე მესამე ოსკარია მერილის ცხოვრებაში.
წლის ქალთა სიაში მეოთხე ადგილზე სავიტა ჰალაპანავარი მოხვდა. როდესაც 31 წლის ორსული ექიმი-სტომატოლოგი ქალაქ გოლუეის კლინიკაში მივიდა, ექიმებმა მას მუცლის მოშლა დაუდგინეს, თუმცა, ირლანდიის კანონმდებლობის მიხედვით, აბორტი აკრძალულია იმ შემთხვევაში, თუ ნაყოფის გულისცემა ჯერ კიდევ არ შეჩერებულა. ორდღიანი აგონიის შემდეგ სავიტა გარდაიცვალა. ქვეყნის პრემიერ-მინისტრმა ენდა კენიმ განაცხადა, რომ მალე ხელისუფლება წარმოადგენს კანონპროექტს, რომელიც ქალებს ნებას დართავს, გაიკეთონ აბორტი იმ შემთხვევაში, თუ მათ სიცოცხლეს საფრთხე ემუქრება.
"მადამ ფიგაროს" ხუთეულს ვალერი ტრიეპვეილერი ასრულებს. 7 მაისს მან თავის ცხოვრების თანამგზავრს, რომელიც ამ დროისათვის უკვე საფრანგეთის პრეზიდენტი იყო, საჯაროდ აკოცა. რამდენიმე კვირის შემდეგ ის სკანდალის ცენტრში აღმოჩნდა, როდესაც ტვიტერზე დისიდენტ ოლივიე ფალორინს დაუჭირა მხარი. ვალერი რამდენიმე თვის განმავლობაში დუმდა და მხოლოდ ოქტომბერში შეიტანა სარჩელი. მეუღლე ფრანსუა ოლანდი მას სრულ მხარდაჭერას უცხადებს.