იუსტიციის მინისტრმა თეა წულუკიანმა კათოლიკეებს შობის დღესასწაული მიულოცა. წულუკიანი შობის დღესასწაულს ლესელიძეზე მდებარე კათოლიკურ ტაძარში შეხვდა, სადაც მესა ეპისკოპოსმა ჯუზეპე პაზოტომ აღავლინა. ცერემონიის დასრულების შემდეგ იუსტიციის მინისტრმა ტაძარში შეკრებილ კათოლიკეებს სიტყვითაც მიმართა.
,,ყველას გილოცავთ ამ ძალიან დიდ დღეს. ზოგად ქრისტიანულ დღეს. ჩვენი სულიერი თავისუფლების დღეს ყველა ქრისტიანისთვის. ჩვენი აქ ყოფნა ბუნებრივია იმიტომ, რომ ჩვენ ერთი რწმენის წარმომადგენლები ვართ, რაც არ უნდა განსხვავებული არსებობდეს ჩვენს შორის. მე, როგორც ჭეშმარიტი მართალმადიდებელი, რომელიც სულ რამდენიმე დღეში იზეიმებს ამ დღესასწაულს, გილოცავთ მთელი გულით ამ დღეს, თქვენ ხართ ჩვენი სისხლი და ხორცი. თქვენ ხართ ის ადამიანები, რომლებიც საქართველოს სულიერ კულტურას, ისტორიას მისცა არაერთი წარმომადგენელი, რომელთაც თავიაანთი ხელით ატარეს ჩვენი ქვეყანა და მოიყვანეს დღემდე. ამიტომ მინდა მოგცეთ გარანტია, როგორც მთავრობის წარმომადგენელმა, რომ ჩვენი ხელისუფლების პირობებში რელიგიური თავისუფლება იქნება ხელშეუხებელი, და ჩვენ არავის არ მივცემთ და პირველ რიგში ჩვენ თავს არ მივცემთ უფლებას იმის უფლებას, რომ რომელიმე რელიგია, იქნება ეს უმცირესობა თუ უმრავლესობა, ხელისუფლებამ ან ვინმემ თავის იარაღად გამოიყენოს", _განაცხადა იუსტიციის მინისტრმა და აღნიშნა, რომ ახალი ხელისუფლების პირობებში ყველა აღმსარებლბის უფლებები დაცული იქნება.
,,ჩვენ ვართ ისეთი რელიგიური თავისუფლების მომხრე, რომლის პირობებში ყველა რელიგიას აქვს თავისუფალი აღმსარებლობის ნება, სახელმწიფოს აქვს თავისი პოზიტიური ვალდებულებები და ამას ასრულებს, მაგრამ სახელმწიფო სხვა მხრივ არ ერევა სხვა ერების აღმსარებლობის თავისუფლებაში. ყველა აღსარებაში არის თავისუფალი და სწორედ ეს არის დემოკრატიული საზოგადოების ერთ-ერთი საფუძველი. მე მინდა ვთქვა ერთი ჩემთვის და საზოგადოებისთვის მნიშვნელოვანი საკითხი ჩვენ ვართ დღეს აქ, სიყვარულის ადგილას, ჩვენ ვართ აქ ქრისტიანულ ტაძარში და მე მინდა ვთქვა მე არ მძულს არავინ, რადგან ვარ ჭეშმარიტი ქრისტიანი, მაგრამ როგორც ჭეშმარიტი ქრისტიანი მე და ჩემი მთავრობა ვიქნებით სიმართლის ერთგული და ყოველთვის ვიბრძოლებთ სამართლიანობისთვის", _ განაცხადა წულუკიანმა.