დღეს, 24 დეკემბერს, 13:00-დან 14:00 საათამდე, მახათაზე მშენებარე ივერიის ღვთისმშობლის ხატის სახელობის ტაძრის მშენებლობის ფონდ "ივერიისას" დამფუძნებელი პაატა ბურჭულაძე განმავლობაში "08"-ს აბონენტებს თავად უპასუხებს.
როგორც "ჯი-ეიჩ-ენს" ფონდიდან აცნობეს, მახათაზე მშენებარე ივერიის ღვთისმშობლის ხატის სახელობის ტაძრის შესახებ ინფორმაციის მიღება დღეიდან "08"-ს საინფორმაციო ცენტრის საშუალებითაც გახდება შესაძლებელი.
პაატა ბურჭულაზე თავად უპასუხებს "08"-ს აბონენტებს და ყველა დაინტერესებულ მოქალაქეს მიაწვდის ინფორმაციას მახათაზე მშენებარე ტაძრის შესახებ.
"ივერიის ღვთისმშობლის ხატის სახელობის ტაძარს მთელი საქართველო და უცხოეთში მცხოვრები ქართული ემიგრაცია ერთნაირი ძალისხმევით ვაშენებთ. ამ სახალხო აქციაში 204 ათასზე მეტი ადამიანია გაერთიანებული. გახდე ტაძრის აღმშენებელი, ნებისმიერ მსურველს შეუძლია, ამისათვის საჭიროა შეავსოთ სპეციალური ანკეტა და გაიღოთ შემოწირულობა თქვენი ახლობელი ადამიანების სახელზე, როგორც ცოცხლებზე, ისე გარდაცვლილებზე. ტაძრის მშენებელთა გვარ-სახელები სპეციალურ წიგნში განთავსდება, რომელიც ტაძარში დაიდებს ბინას",-ნათქვამია ფონდის განცხადებაში.
ისტორიული მშენებლობა წელს, 17 აპრილს დაიწყო და საძირკველი უკვე დასრულებულია. მშენებლობა 2700 კვ. მეტრზე მიმდინარეობს.
მშენებლობისათვის თვალყურის დევნება ნებისმიერ მსურველს სახლიდან გაუსვლელად შეუძლია. ამისათვის საჭიროა შესვლა მისამართზე www.makhata.ge და ლივე რეჟიმში თვალის დევნება, თუ როგორ შენდება ტაძარი, რომელსაც თითოეული ადამიანი მთელ საქართველოსთან ერთად აშენებს.
