საპარლამენტო უმცირესობის წევრმა, ყოფილმა გარემოს დაცვის მინისტრმა გოგა ხაჩიძემ ბიძინა ივანიშვილის ბიზნესცენტრთან ხურდა ფული გადაყარა, - ამის შესახებ მან საკუთარი "ფეისბუქის" გვერდზე კომენტარი გამოაქვეყნა, რომელსაც გთავაზობთ უცვლელად:
"ვაა, მაგარ ამბავს შევესწარი, მთაწმინდისკენ მივდიოდი ტაქსით. ივანიშვილის ბიზნესცენტრთან, ტაქსისტმა საფერფლიდან ხურდა ამოიღო და ფანჯრიდან გადააგდო. რას აკეთებ-მეთქი?! -ვკითხე. მიპასუხა: თუ გინდა, რომ შენმა შვილმა მილიარდი იშოვოს, აქ ხურდა უნდა გადააგდოო.
უკან ჩამოვლაზე მეც გადავაგდე ხურდა და მაგრად გაუსწორდა.
უნდა ვაღიარო, რომ მეც გამისწორდა. ვიგრძენი, რომ ტაქსში რაღაცნაირმა სიმშვიდემ და ოპტიმიზმმა დაისადგურა.
მაგარი ამბავი კი ისაა, რომ იგოეთის მაგივრად ბიძოეთი გაგვეჩითა, ხურდების გადაყრის ამბავში. გინდათ რომ თქვენმა შვილმა მილიარდი იშოვოს?!", - წერს ხაჩიძე.
