დავით დარახველიძე დევნილ მოსახლეობასთან შეხვედრას ყოველდღიურ რეჟიმში აგრძელებს. დღეს მინისტრი ყოფილი „მექანიკის ინსტიტუტის" შენობის გადახურვის საკითხით დაინტერესდა და ჩატარებული სამუშაოები დაათვალიერა.
კახეთის გზატკეცილზე, აღნიშნულ შენობაში მცხოვრებ დევნილებთან შესახვედრად მინისტრი რამდენიმე კვირის წინ იმყოფებოდა. დევნილებმა მინისტრს არაერთი პრობლემის მოგვარება სთხოვეს. მათ შორის იყო შენობის გადახურვა. მინისტრმა დევნილებს პირობა მისცა, რომ აღნიშნული პრობლემა მოგვარდებოდა. დღეს კი დავით დარახველიძემ შესრულებული სამუშაოები თავად დაათვალიერა, დევნილ მოსახლეობას ბარბარობა მიულოცა და ტკბილეულიც მიუტანა.
დევნილი მოსახლეობა კმაყოფილებას ვერ მალავდა. როგორც მათ აღნიშნეს 18 წლის მანძილზე მსგავსი არც დაპირება ახსოვთ და არც საქმის შესრულება. „18 წლის მანძილზე პირველი შემთხვევაა, რომ მინისტრს კი არ დავსდევთ, პირიქით 3 კვირის განმავლობაში 2-ჯერ მოვიდა ჩვენთან. ერთხელ მოვიდა და დაგვპირდა, მეორედ კი შესრულებული თავად გადაამოწმა. ძალიან გახარებულები ვართ. თავს ადამიანებად ვგრძნობთ. სიტყვები არ გვყოფნის. პირველად რომ მოვიდა, გვითხრა, შენობის გადახურვას ხვალვე დავიწყებთო. შედეგიც გვაქვს - აღარ გვაწვიმს. იმედი გვაქვს, სხვა პრობლემებიც ეტაპობრივად მოგვარდება" - აღნიშნა აფხაზეთიდან დევნილმა დავით სორდიამ.
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის დავით დარახველიძის თქმით, დარჩენილ პრობლემებზე მუშაობაც დაწყებულია და ეტაპობრივად სხვა საკითხებიც მოწესრიგდება.
