ჯანდაცვის მინისტრი დავით სერგეენკო მზადაა სოციალურად დაუცველ მოქალაქეებს და მათ არსებული პრობლემების მოგვარებაში, თავისი კომპეტენციის ფარგლებში დაეხმაროს.
„მე ყოველთვის მზად ვარ მათთან შესახვედრად. რაც დაპირება იყო მე შევასრულე და თუ მათ რაიმე ახალი საჭიროებები შეექმნათ, მე მზად ვარ მათ დავეხმარო იმ კომპეტენციისა და იმ შესაძლებლობების ფარგლებში რაც ჯანდაცვის სამინისტროს გააჩნია"- განაცხადა მინისტრმა.
აღსანიშნავია, რომ გუშინ, 12 დეკემბერს პრემიერ მინისტრთან შეხვედრის შემდეგ რკინიგზის საავადმყოფოში შეჭრილი მოქალაქეების რამოდენიმე წარმომადგენელი (კახაბერ ოდიშელიძე, ლალი ლუკავა, ირაკლი ბაღათურია, მანონ მებონია) შრომის ჯანმრთელობისა და სოციალური დაცვის მინისტრს დავით სერგეენკოსა და მინისტრის მოადგილეს ირაკლი ნადარეიშვილს შეხვდა. სამინისტროს ინფორმაციით, მოქალაქეების მოთხოვნების დაკმაყოფილება სცილდება ჯანდაცვის სამინისტროს კომპეტენციის ფარგლებს, ისინი უარს აცხადებენ მინისტრის შეთავაზებაზე, შესაბამისად მოლაპარაკება უშედეგოდ დასრულდა.
ჯანდაცვის სამინისტროს ინფორმაციით, 15 ნოემბრამდე ჯანდაცვის სამინისტროს (სოციალური მომსახურების სააგენტოს) ბინით უზრუნველყოფის თაობაზე განცხადებით მომართა 2302-მა ოჯახმა.
„მოხდა ყველა ოჯახის ანკეტირება. მთავრობის 2012 წლის 31 ოქტომბრის #1915 განკარგულების შესაბამისად მოხდა ოჯახების ანკეტირება.
ანკეტირების შედეგად მიღებული მონაცემები დამუშავდა საქართველოს მთავრობის 2012 წლის 28 ნომებრის #454 დადგენილების შესაბამისად.
მონაცემთა ბაზის დამუშავების შედეგად სავარაუდო ბენეფიციართა რაოდენობამ შეადგინა 1195 ოჯახი. ხოლო დანარჩენი 1107 ოჯახი ზემოთხსენებული დადგენილების თანახმად არ იქნა განხილული, როგორც სავარაუდო ბენეფიციარი ოჯახი.
1107 ოჯახიდან 560 ოჯახი ვერ მოხვდა სავარაუდო ბენეფიციართა სიაში იმიტომ რომ, ოჯახის ერთი წევრი მაინც ცხვოვრობს დევნილთა კომპაქტური განსახლების ობიექტში, ან იმ საცხოვრებლებში, რომელიც დაუკანონდათ დევნილთა სამინისტროს მიერ.
60 ოჯახი ვერ მოხვდა იმიტომ რომ, ოჯახის ერთ წევრს მაინც სახელმწიფოსაგან ან კერძო ინვესტორისაგან მიღებული აქვს ფულადი კომპენსაცია საცხოვრებელი ფართის სანაცვლოდ.
87 ოჯახის ერთ წევრს მაინც სსიპ საჯარო რეესტრის ეროვნულ სააგენტოში რეგისტრირებული აქვს საცხოვრებელი ფართი, ბინა.
400 ოჯახის წევრების ერთობლივი წევრების შემოსავალი აღემატება 193 ლარს. შედეგად სავარაუდო ბენეფიციარებად განისაზღვა 1195 ოჯახი.
დღეის მონაცემებით, 200 ლარი გადარიცხული აქვს 757 ოჯახს"- აცხადებენ ჯანდაცვის სამინისტროში.
