თელავის რაიონის სოფელ ნასამხრალში ავტოსაგზაო შემთხვევის შედეგად 7 წლის გოგონა მძიმედ დაშავდა. მას მსუბუქი ავტომანქანა მაშინ დაეჯახა, როდესაც საკუთარი სახლის ეზოში შედიოდა. დაზარალებული თელავის ბავშვთა ჯანმრთელობის ცენტრიდან თბილისში, იაშვილის კლინიკაში გადაიყვანეს.
ავტომანქანის მძღოლის ვინაობა ჯერ უცნობია, ის შემთხვევის ადგილიდან მიიმალა.
„ბავშვი საავადმყოფოში ტრავმული შოკით შემოიყვანეს. გამოხატული იყო კლინიკური სიკვდილი, პულსი არ ესინჯებოდა. პაციენტს აღენიშნებოდა თავის დახურლი ტრავმა და ბარძაყის ძვლის მოტეხილობა. რენდგზენზე მუცლის ღრუ გავაშუქეთ და დაზიანებები არ აღმოჩნდა, თუმცა სავარაუდოდ, დაზიანებული აქვს ზურგის მალები, რაზედაც ოპერაცია დასჭირდება. სასწრაფოდ რეანიმაციაში მართვითი სუნთქვის აპარატზე შევაერთეთ, რის შედეგადაც მისი ჯანმრთელობის მდგომარეობა შედარებით გაუმჯობესდა. ბავშვი საფუძვლიანი გამკვლევებისთვის კატასტროფის მედიცინის ცენტრის ბრიგადამ თბილისში გადაიყვანა", - განუცხადა კახეთის საინფორმაციო ცენტრს თელავის ბავშვთა ჯანმრთელობის ცენტრის დირექტორმა თამილა თეიმურაზიშვილმა.
მომხდარზე აღძრულია სისხლის სამართლის საქმე. გამოძიებას საპატრულო პოლიცია აწარმოებს.
