დათა ახალაიას, გერონტი ალანაიას, სოსო თოფურიძეს და ოლეგ მელნიკოვს პატიმრობა დაუსწრებლად შეეფარდათ. მოსამართლე ბესიკ იმნაიშვილმა პროკურორების მოთხოვნა ოთხივე ბრალდებულისათვის აღმკვეთი ღონისძიების შეფარდების შესახებ, სრულად დააკმაყოფილა.
დაცვის მხარემ ბრალის წაყენების პროცედურები გააპროტესტა, რომელიც, მათი აზრით, დარღვეული იყო. ადვოკატების განცხადებით, პატიმრობის შეფარდებისათვის არ არსებობდა ბრალდებულების წინააღმდეგ სათანადო მტკიცებულებებიც, თუმცა, მოსამართლემ ადვოკატების პროტესტი არ გაითვალისწინა.
ამ დროისათვის, არცერთი ბრალდებული საქართველოში არ იმყოფება. ახალაიამ და თოფურიძემ საქართველო მიმდინარე წლის 5 ოქტომბერს დატოვეს, ალანიამ - 22 ოქტომბერს, ხოლო მელნიკოვმა - 2010 წლის 2 დეკემბერს. ყოფილ მაღალჩინოსნებს სამსახურეობრივი უფლებამოსილების გადამეტებაში, ხოლო ახალაიას, დამატებით, თავისუფლების უკანონო აღკვეთაში ედებათ ბრალი.
