ინგა გრიგოლია საზოგადოებრივ მაუწყებელზე ბრუნდება. გაზეთი "პრაიმტაიმთან" საუბარში გრიგოლია არ საუბრობს გადაცემის დეტალებზე. თუმცა ამბობს, რომ ეს იქნება საათნახევრიანი პოლიტიკური დებატები პირდაპირ ეთერში. გადაცემა გავა კვირაში ორჯერ ა დიდი დარბაზის მონაწილეობით, რიგითი მოქალაქეების ჩართულობით, ყველა პოლიტიკური მხარის მონაწილეობით.
"დღეს ყველაზე ცხელი, ქართული პოლიტიკაა. ვფიქრობ, ამიტომ აღმოჩნდა ჩემი შეთავაზება საზოგადოებრივი მაუწყებლისთვის საინტერესო. მართლა დიდი მონდომებით შევუდექი ამ პროექტზე მუშაობას. სრულიად მობილიზებული ვარ. ვფიქრობ, საინტერესო გამოვა. საზოგადოებრივ მაუწყებელზე ამ ტიპის ბევრი გადაცემა უნდა იყოს. გადაცემა შესაძლებელია 20 დეკემბრის შემდეგ, თვის ბოლოს გავიდეს ეთერში. საგანგებოდ ჩემთვის ახალი სტუდია არ კეთდება. შევეცდებით არსებული ბაზა განახლებული სახით გამოვიყენოთ. ვფიქრობ, ჩემთან ერთად გადაცემაზე იმუშავებს საინტერესო გუნდი. თოქ-შოუს მთავარი რეჟისორი იქნება, ჩემი განუყრელი ზურა ფანქველაშვილი, ვისთან ერთადაც ვაკეთებდი ყველაზე დიდ თოქ-შოუებს - "რეაქცია", "ღია ეთერი", "პრაიმტაიმი" და "პოლიტიკური კვირა". ის გუნდი მეყოლება, ვისთან ერთადაც მიკეთებია გადაცემები. ბევრჯერ მითქვამს, რომ ჩემი გადაცემების რეიტინგი მხოლოდ ინგა გრიგოლიას დამსახურება არ ყოფილა. ეს იმ გუნდის დადებული რეიტინგი იყო, ვისთან ერთადაც მიმუშავია. მათ შორის ერთ-ერთი მნიშვნელოვანი დ საკვანძო ფიგურა იყო ფანქველაშვილი", - აცხადებს გაზეთთან საუბარში გრიგოლია.