ინტერპოლმა წითელი ცირკულარით ძებნილი პირები დააკავა. ინტერპოლის ცენტრალური ეროვნული ბიუროს უფროსის ალექსანდრე არაყიშვილის განცხადებით, ინტერპოლის მიერ წითელი ცირკულარით ძებნილი პირები დაკავება არის ნათელი დადასტურება იმ შეხვედრის წარმატებისა, რომელიც შედგა რომში საქართველოს შინაგან საქმეთა მინისტრსა და ინტეპოლის გენერალურ მდივანს შორის. მისი თქმით, შეხვედრაზე მიღწეული შეთანხმების მიხედვით, საერთაშორისო დამნაშავეების გადაცემა მოხდება იმ ქვეყნებისთვის, რომლებიც მათ გადაცემას მოითხოვდნენ.
1) თენგიზ ფერაძე
2012 წლის 8 ნოემბერს პოლონეთის ქალაქ რავამაზოვიეცკაში დააკავეს საქართველოს ინტერპოლის მიერ 2012 წლის 28 ივნისიდან წითელი ცირკულარით საერთაშორისო ძებნაში მყოფი, 1979 წელს დაბადებული თენგიზ ნოდარის ძე ფერაძე. აღნიშნული პიროვნება საქართველოს სამართალდამცავი ორგანოების მიერ საქართველოს სსკ-ის 24,339-ე და 180-ე მუხლებით იძებნებოდა, რაც ქრთამის მიცემის წაქეზებასა და თაღლითობას გულისხმობს. დაწყებულია წინასაექსტრადიციო პროცედურები. იხილეთ ფოტოსურათი
2) ჩარლზ არტურ ფლეტჩერი
2012 წლის 13 ნოემბერს თბილისის ინტერპოლის ეროვნულმა ცენტრალურმა ბიურომ 2012 წლის 27 სექტემბრიდან ვაშინგტონის ინტერპოლის მიერ წითელი ცირკულარით ძებნილი, ამერიკის შეერთებული შტატების მოქალაქე, 1953 წელს დაბადებული ჩარლზ არტურ ფლეტჩერი დააკავა.
ძებნილის დაკავების შესახებ დაუყოვნებლად ეცნობა ვაშინგტონის ინტერპოლს. მიმდინარეობს ამერიკული მხარისთვის ჩარლზ არტურ ფლეტჩერის გადაცემის პროცედურები .
3) სვიატოსლავ მელაი
2012 წლის 23 ნოემბერს თბილისის საერთაშორისო აეროპორტში საქართველოს სახელმწიფო საზღვრის კვეთის დროს დააკავეს 1961 წელს დაბადებული სვიატოსლავ ვიქტორის ძე მელაი. აღნიშნული პიროვნება თაღლითობის ბრალდებით კიევის ინტერპოლის მიერ წითელი ცირკულარით იძებნებოდა.
4) აჰლიმან მანსუროვი
2012 წლის 29 ნოემბერს სასაზღვრო-საკონტროლო გამშვებ პუნქტში, „წითელ ხიდზე" საქართველოს სახელმწიფო საზღვრის კვეთის დროს აზერბაიჯანის მოქალაქე, 1971 წელს დაბადებული აჰლიმან მანსუროვი დააკავეს. ინტერპოლის თბილისის ბიურომ დადგინა, რომ აღნიშნული პიროვნება მიმდინარე წლის მაისიდან გერმანიის ინტერპოლის მიერ დამამძიმებელ გარემოებებში არაერთგზის ჩადენილი ქურდობისთვისა და სხეულის დაზიანებისთვის იძებნებოდა . მანსუროვის დაკავების შესახებ ეცნობა გერმანიის ინტერპოლს. მიმდინარეობს წინასაექსტრადიციო პროცედურები.
5) ნიკოლოზ ქავთარაძე
2012 წლის 13 დეკემბერს თბილისის ინტერპოლის მიერ საერთაშორისო ძებნაში მყოფი, 1981 წელს დაბადებული ნიკოლოზ ბეჟანის ძე ქავთარაძის საბერძნეთიდან საქართველოში ექსტრადიცია განხორციელდება. აღნიშნული პიროვნება საქართველოს ინტერპოლის მიერ საერთაშორისო ძებნაში 2012 წლის 25 ივნისიდან იმყოფებოდა. საქმე აღძრულია სსკ-ის 276-ე მუხლის მე-5 ნაწილით , 373-ე მუხლის მე-2 ნაწილითა და ამავე მუხლის მე-3 ნაწილის „ა" ქვეპუნქტით, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც ადამიანის სიცოცხლის მოსპობა გამოიწვია.
6) ზენფირა ისმაილოვა
2012 წლის 6 ნოემბერს თურქეთიდან საქართველოს მიმართულებით შემოსვლისას სასაზღვრო საკონტროლო გამშვებ პუნქტზე 1962 წელს დაბადებული აზერბაიჯანის მოქალაქე ენფირა ისმაილოვა დააკავეს. აღნიშნული პირი 2012 წლის 14 აგვისტოდან საერთაშორისო ძებნაში ადამიანების ტრეფიკინგთან დაკავშირებული დანაშაულის ჩადენისთვის იმყოფებოდა. ზენფირა ისმაილოვას ექსტრადიცია აზერბაიჯანში უკვე განხორციელდა.
