აფხაზთიდან დევნილი 64 ოჯახი დღეიდან რეაბილიტირებულ ფართში იცხოვრებს. იძულებით გადაადგილებულ პირებს ბინის გასაღები დღეს დევნილთა მინისტრმა დავით დარახველიძემ გადასცა.
ქუთაისში, ყოფილი მუსიკალური სკოლა-ინტერნატის შენობა, ჭავჭაძის №58, სადაც იძულებით გადაადგილებული პირები შესახლდნენ, გერმანიის განვითარების ბანკის ხელშეწყობით გარემონტდა. რეაბილიტაციამდე კი დევნილები აღნიშნულ ობიექტში საკმაოდ ცუდ პირობებში ცხოვრობდნენ. გარდა, ამისა, იმავე ეზოში დევნილებისთვის აშენდა ოთხსართულიანი კორპუსი. მთლიანობაში, დღეს ახალი ბინის გასაღები 64-მა ოჯახმა მიიღო.
ფართის განაწილება მოხდა სულადობის მიხედვით. ერთსულიანმა ოჯახმა ერთოთახიან ბინა მიიღო (ფართი 30 კვ მეტრი); ორსულიანმა ოჯახმა - ასევე ერთოთახიანი ბინა (ფართი 43 კვ მეტრი); სამ და ოთხსულიან ოჯახს 52 და 54 კვ მეტრის ოდენობის ფართი გადაეცა; ხუთ და ექვსსულიანმა ოჯახებმა სამოთახიანი ბინები მიიღეს (ფართი 68 -75 კვ მეტრი);
თითოეულ ოჯახს, პროექტის ფარგლებში ახალ ბინებში დახვდა გაზქურა და გამათბობელი. ასევე, წყლის ავზი.
იძულებით გადაადგილებულმა პირებმა დავით დარახველიძესთან საუბრისას აღნიშნეს, რომ 20 წელია ადამიანურ პირობებს ელიან და როგორც იქნა ეღირსნენ. ,,დევნილობიდან დღემდეე გაუსაძლის პირობებში ვცხოვრობდით. ვითმენდით და ველოდებოდით, რომ ჩვენი დროც დადგებოდა. ძალიან გვჭირადა. არ გვჯერა, რომ საკუთარი ბინდა გვაქვს, თან გარემონტებული, აბაზანითა და სამზარეულოთი. ძალიან გვიხარია, მადლობის მეტი არაფერი გვეთქმის" - აღნიშნა დევნილმა დალი ღურწკაიამ რომელსაც მინისტრი ახალ ბინაში ესტუმრა და ახალმოსახლეობა მიულოცა.
დავით დარახველიძის განცხადებით იძულებით გადადგილებულ პირთა საცხოვრებელი პირობების გაუმჯობესება გაგრძელდება: ,,ძალიან კარგი საქმე გაკეთდა იმ ადამიანებისათვის რომლებიც წლების განმავლობაში უყურადღებოდ იყვნენ მიტოვებულები. დღეს იძულებით გადადგილებულ 64 ოჯახს მოუგვარდა საბინაო პრობლემა და პროცესი გაგრძელდება."
მინისტრმა მადლობა გადაუხადა გერმანიის განვითარების ბანკს რომლის მხარდჭერითაც განხორციელდა აღნიშნული პროექტი.