კახეთის გუბერნატორი ზურაბ ჭიაბერაშვილი აცხადებს, რომ სტიქიით დაზარალებულთა თაობაზე პრემიერ-მინისტრს რამდენიმეჯერ მიმართა, მაგრამ პასუხი არ მიუღია. ამის შესახებ კახეთის საინფორმაციო ცენტრში აცხადებენ.
"პრემიერ-მინისტრს 4-ჯერ მივმართე. აქედან, სამი წერილი, ივლისში სტიქიით დაზარალებულ მოსახლეობას ეხება, მეოთხე 13-14 ოქტომბერს, ლაგოდეხის რაიონში მიწისძვრის შედეგად დაზარალებულებს. არც ერთ წერილზე პასუხი არ მიმიღია, ზამთარი კი უკვე მოვიდა. კარგი იქნება, პრემიერმა მთავრობის სხდომის დღის წესრიგში შეიტანოს ეს საკითხი და მზად ვარ, რომ მივიდე მთავრობის სხდომაზე და მოვახსენო, რა სამუშაოებია გაწეული და რა შეიძლება კიდევ გაკეთდეს", - განაცხადა ჭიაბერაშვილმა.
"მე წავიკითხე მინისტრის მოადგილის თენგიზ შერგელაშვილის კომენტარი, რომ ამ ეტაპზე ვერ დაითვლიან, სად რამდენი პომიდორი დაზიანდა. ამის დათვლა ძალიან მარტივია. ჩვენ აღწერილი გვაქვს ყველა დაზარალებული ოჯახი, მათ მინიჭებული აქვთ კატეგორიები, ანუ რამდენი პროცენტით გაუნადგურდა მოსავალი თითოეულ ოჯახს. საჯარო რეესტრში არის ინფორმაცია, ოჯახი რა ოდენობის მიწას ფლობს. ახალ მთავრობას შეუძლია შეიმუშაოს კრიტერიუმი, რამდენი ყურძენი მოვიდოდა იმ ფართობზე. თუ ეს ფართობი დაზიანდა 100%-ით, ოჯახს უნდა გადაუხადონ მთლიანი თანხა, თუ 70%-ით, მოსავლის ღირებულების 70% და ა.შ. იმის დადგენა, რამდენი მოსავალი გაფუჭდა და რა თანხა უნდა აანაზღაურონ, რთული არ არის", - განაცხადა ჭიაბერაშვილმა.
მისი თქმით, ზარალის ანაზღაურებასთან დაკავშირებით ახალი მთავრობის სტრატეგია მისთვის უცნობია.
"ქართული ოცნება" მაშინდელი მთავრობის პარალელურად აწარმოებდა ზარალის აღწერას და ალბათ აქვთ ეს მონაცემები. შეუძლიათ, შეადარონ ეს მონაცემები იმ მონაცემებს, რაც წინა მთავრობამ დადო და ამის მიხედვით გადაუხადონ კომპენსაცია დაზარალებულებს. ჩემთვის სტიქიით დაზარალებულ მოსახლეობისთვის კომპენსაციების გაცემასთან დაკავშირებით ახალი მთავრობის სტრატეგია უცნობია, ჩემი წერილების მიზანიც ეს არის, რომ გავიგო რას აპირებენ, რადგან ბევრი დაზარალებული მეკითხება, რა სახის კომპენსაცია იქნება და მე პასუხი არ მაქვს. ჯერჯერობით სტრატეგია არ ჩანს. ფაქტია, რომ მოქალაქე ივანიშვილს სახელმწიფო ხაზინიდან დაუბრუნდა ის 80 მილიონი, რომელიც განსაზღვრული იყო კახეთში სტიქიით დაზარალებულებისთვის. ეს 80 მილიონი დაბრუნდება თუ არა ხაზინაში და დაიხარჯება თუ არა საკომპენსაციოდ, თუ ბიუჯეტიდან სხვა სახსრების მობილიზაციას გააკეთებს ფინანსთა სამინისტრო და ის დაიხარჯება, ან საერთოდ დაიხარჯება თუ არა რამე, უცნობია. თუ გავიგებთ, რომ ახალი მთავრობა დაპირების შესრულებას და კომპენსაციების გაცემას არ აპირებს, ეს ჩვენი პოლიტიკური შეფასების საგანი გახდება", - განაცხადა ჭიაბერაშვილმა.
გუბერნატორის ინფორმაციით, ლაგოდეხის გამგეობაში მიწისძვრის შედეგად დაზარალებულების სულ 656 განცხადებაა შესული.
შეგახსენებთ, რომ 15 ნოემბერს, რეგიონული განვითარების და ინფრასტრუქტურის მინისტრის მოადგილემ თენგიზ შერგელაშვილმა კახეთის საინფორმაციო ცენტრს განუცხადა, რომ მთავრობა სტიქიით მიყენებულ ზარალს ახლა ვერ დაითვლის და ამიტომ დაზარალებულებისთვის კომპენსაციის გაცემის საკითხი ჯერ დღის წესრიგში არ დგას: "სასოფლო-სამეურნეო სავარგულების და მოსავლის დაზიანების შედეგების ახლა დადგენა შეუძლებელია. 6 თვის შემდეგ როგორ დავადგინოთ, სად რამდენი კომბოსტო და პომიდორი დაზიანდა? ამიტომ ზარალის ანაზღაურებაზე საუბარი ჯერ არ არის", - განაცხადა შერგელაშვილმა.