რკინიგზის საავადმყოფოში უკანონოდ შესახლებული სოციალურად დაუცველი პირები პროტესტს განაგრძობენ. მათ ჯანდაცვის სამინისტროს მიმდებარე ტერიტორია გადაკეტეს, სადაც მოძრაობა პარალიზებულია.
სოციალურად დაუცველები ჯანდაცვის უწყებისგან მათი საცხოვრებელი პრობლემების მოგვარების თაობაზე პასუხს ელოდებიან და ფართებით დაკმაყოფილებას ითხოვენ.
წინა კვირას მათ ჯანდაცვის სამინისტროს წარმომადგენელი შეხვდა და პრობლემების განხილვას დაჰპირდა, თუმცა უწყებისგან პასუხი აქციის მონაწილეებს ამ დრომდე არ მიუღიათ.
სოციალურად დაუცველები აცხადებენ, რომ მოთხოვნის დაუკმაყოფილებლობის შემთხვევაში, საქართველოს მოქალაქეობაზე უარს იტყვიან.
,,ჩვენ ველოდებით ჯანდაცვის მინისტრის დაპირებას. გვითხრეს რომ ბოლო პასუხი ჩვენ შესახებ ორშაბათს იქნებოდა. სამინისტროს მხრიდან შემოთავაზება იყო ბინის ქირაობა, მაგრამ ჩვენ უარი ვუთხარით. შემდეგ იყო შემოთავაზება მუდმივად ბინის ქირაობა და ველოდებით კონკრატული პასუხებს. მე, პირადად, საქართველოს მოქალაქეობაზე უარს ვამბობ და რამდენიმე ადამიანიც ჩემს აზრზეა. ჩვენ სულში ჩაფურთხებულები გამოვდივართ", - განაცხადა ჟურნალისტებთან სოციალურად დაუცველმა კახაბერ ოდიშარიამ.
შეგახსენებთ, რომ სოციალურად დაუცველი რამდენიმე ოჯახი რკინიგზის საავადმყოფოში უკვე ერთი თვეა უკანონოდაა შესახლებული.
