დუშეთის რაიონის სოფელ ოძისში დავით და გიორგი ერისთავების სახლ-მუზეუმში აივანი ჩამოინგრა. როგორც მცხეთა - მთიანეთის საინფორმაციო ცენტრს მუზეუმის დირექტორმა დიმიტრი რუსიამ განუცხადა, ერისთავების სასახლე, სადაც მუზეუმია გათავსებული იმდენად მძიმე მდგომარეობაშია, რომ შეიძლება შენობაც ჩამოინგრეს.
„მუზეუმის შენობა ძალიან ძველია და გადაუდებელი რეაბილიტაცია სჭირდება. შენობა ორსართულიანია და სულ18 ოთახია. აქედან რამდენიმეში დაზიანებული სახურავიდან წყალი ჩამოდის. წვიმის დროს ოთახებში ვედროებს ვდგავთ, რომ ექსპონატები არ დაზიანდეს. საბედნიეროდ, ისინი დაზიანებული არ არის, მაგრამ განადგურების საფრთხის წინაშე ნადვილად დგას. ძველია და შესაცვლელი იატაკი და კარ-ფანჯარა. პირველ სართულზე მარანია განთავსებული და არცერთ კარ-ფანჯარას მინა არ აქვს. მინა რამდენჯერმე საკუთარი სახსრებით შევიძინე და ჩავსვი, ახლობლები დამეხმარნენ, ახლა კი ამის საშუალება აღარ მაქვს. მუზეუმს ბოლო 10 წელიწადია, რაც ეს პრობლემა აქვს და ასეთ პირობებს დიდხანს ვეღარ გაუძლებს. გასულ წლებში კულტურისა და ძეგლთა დაცვის სამინისტროს დასახმარებლად არაერთხელ მივმართე. ინფორმაციასთან ერთად ფოტომასალებიც მივაწოდე, თუმცა უშედეგოდ. დასახმარებლად ახალ მინისტრსაც აუცილებლად მივმართავ", - აღნიშნა დიმიტრი რუსიამ.
სასახლე XVIII საუკუნის ბოლოს და XIX საუკუნის დასაწყისშია აშენებული. შენობას კულტურული მემკვიდრეობის ძეგლის სტატუსი აქვს მინიჭებული.